კლუბ ბასიანის ერთ-ერთი დამფუძნებლის, ტატო გეთიას განცხადებით, თუ 11 მაისს სპეცოპერაციის შემდეგ დახურული კლუბი პირველ ივნისამე არ გაიხსნება, ფინანსური პრობლემები შეექმნება დაიხურება.

"თუ ისინი ჩვენ კლუბს არ დაგვიბრუნებენ ივნისის პირველ რიცხვამდე, ჩვენ იძულებულები ვიქნებით, ოფიციალურად დავიხუროთ, ვინაიდან ვეღარ დავფარავთ თვიურ ხარჯებს, ხელფასებს და ზოგადად თუნდაც არტისტების ანაზღაურებას", - განაცხადა გეთიამ TV პირველის ეთერში.

გეთია ამბობს, რომ 21 მაისს პოლიციის მთავარი სამმართველოდან გამომძიებელი დაუკავშირდა, რომელმაც აცნობა, რომ ბასიანს ლუქს მალევე მოხსნიდნენ. მისივე თქმით, მოგვიანეით გამომძიებელმა აცნობა, რომ საგამოძიებო სამუშაოები გრძელდებოდა.

22 მაისს, დალუქვიდან 10 დღეში კაფე გალერი იხსნება. ამ დროისთვის უცნობია როდის გაიხსნება ბასიანი.

11 მაისს გვიან ღამით შსს-მ სპეცოპერაცია ჩაატარა და ნარკორელიზატორობის ბრალდებით რვა პირი დააკავა. რამდენიმე საათში კი პოლიცია ბასიანში, კაფე გალერისა და ბლოუ-ბარში შევიდა, კლუბის სტუმრები გარეთ გაიყვანა და შენობების ჩხრეკა დაიწყო.

ბასიანთან და გალერისთან პოლიციელებს, სპეცრაზმელებსა და მოქალაქეებს შორის სიტყვიერი და ფიზიკური დაპირისპირება მოხდა. სამართადამცავების მოთხოვნის დაუმორჩილებლობისთვის 50-მდე პირი დააკავეს.

12 მაისს ღამით განვითარებულმა მოვლენებმა პარლამენტთან საპროტესტო აქციები გამოიწვია.