შინაგან საქმეთა სამინისტროს თანამშრომლებმა სამცხე-ჯავახეთში პროსტიტუციაში ჩაბმის ბრალდებით 11 პირი ამხილეს. ამის შესახებ ინფორმაციას უწყების პრესსამსახური ავრცელებს.

როგორც უწყებაში აცხადებენ, ბოლო ერთ კვირაში, ცხრა ახალციხესა და ახალქალაქში ე.წ. თურქულ ბარსა და ხუთ რესტორანში პროსტიტუციაში ჩაბმის საქმეზე საგამოძიებო ღონისძიებები ჩაატარეს.

"გამოძიების ფარგლებში აღნიშნულ ობიექტებზე დასაქმებული 63 ქალი მოწმის სახით პოლიციაში გამოიკითხა. დადგინდა, რომ დანაშაულში მხილებული პირები ქალაქ ახალციხეში და ახალქალაქში დროებით მფლობელობაში არსებულ ფართებს გასამრჯელოს სანაცვლოდ ცალკეულ პირებს პროსტიტუციისთვის უთმობდნენ. ისინი, ასევე აღნიშნულ ე.წ. თურქულ ბარებში მომუშავე სხვადასხვა კუთხიდან ჩამოსულ, სხვადსხვა ასაკის ქალბატონებს პროსტიტუციაში მოტყუებით აბამდნენ", - აღნიშნავენ შსს-ში.

საქმეზე გამოძიება სისხლის სამართლის კოდექსის 253-ე მუხლის პირველი ნაწილით მიმდინარეობს. ამ მუხლით, პროსტიტუციაში ჩაბმა ძალადობით, ძალადობის ან ქონების განადგურების მუქარით, შანტაჟით ან მოტყუებით, ისჯება ჯარიმით ან თავისუფლების აღკვეთით ვადით ორ წლამდე.