შინაგან საქმეთა მინისტრი გიორგი გახარია თეთრი ხმაურის მოძრაობის წევრებს, დღეს, სამინისტროს შენობაში შეხვდება. შეხვედრას დაესწრება თხმ-ს ლიდერი ბექა წიქარიშვილი და მოძრაობის რამდენიმე წევრი. სხვა დეტალები ამ დროისთვის უცნობია.

13 მაისს, პარლამენტის წინ აქციაზე მისულმა გიორგი გახარიამ პირობა დადო, რომ პარასკევის სპეცოპერაციასთან დაკავშირებით, აქციის ორგანიზატორების ყველა კითხვას უპასუხებს. შეხვედრა 10:00-ზეა ჩანიშნული.

პარლამენტთან ძალადობისა და რეპრესიული ნარკოპოლიტიკის წინააღმდეგ მიმართული აქცია დაიშალა. ეს გადაწყვეტილება აქციის ორგანიზატორებმა შინაგან საქმეთა მინისტრის გიორგი გახარიას სიტყვით გამოსვლის შემდეგ მიიღეს. თეთრი ხმაურის მოძრაობის წარმომადგენლების თქმით, ისინი აქციებს შაბათამდე წყვეტენ და თუ ხელისუფლებასთან შეთანხმებას ვერ მიაღწევენ აქციები ისევ განახლდება.

შს მინისტრი აქციის ორგანიზატორებს დაპირდა, რომ დაისჯება ყველა ის სამართალდამცველი, რომელმაც უფლებამოსილებას გადაამეტა. ასევე უფლებები აღუდგება ყველა იმ მოქალაქეს, რომელის უფლებებიც სპეცოპერაციის ღამეს დაირღვა. გიორგი გახარიამ თეთრი ხმაურის მოძრაობას უთხრა, რომ ნარკოპოლიტიკის რეფორმის განხილვა უახლოეს მომავალში განახლდება და კანონპროექტი დამტკიცდება.