ქაშუეთის ეკლესიასთან კონტრაქციის კიდევ რამდენიმე მონაწილე დააკავეს. როგორც On.ge-ს ჟურნალისტი ადგილიდან იუწყება, სულ მცირე ორი ადამიანი დააკავეს.

მანამდე, კონტრაქციის ერთ-ერთი ორგანიზატორი ადმინისტრაციული წესით გიორგი გაბედავა დააკავეს. ამის შემდეგ აქციის მონაწილეები ქაშუეთის ეკლესიის ტერიტორიიდან ალექსანდროვის ბაღში გადაიყვანეს. კონტრაქციის მონაწილეები გაბედავას ადგილსამყოფელის გაგებას ითხოვდნენ.

კონტრაქციის მონაწილეებმა ქაშუეთის ეკლესიასთან სანთლები დაანთეს. რამდენიმე მეტრში თეთრი ხმაურის მოძრაობის აქცია - "ჩვენი თავისუფლებისთვის" საპროტესტო ცეკვის ფონზე გრძელდება. კონტრაქციის წევრებს სურთ რომ 9 აპრილის მემორიალთან გადავიდნენ, თუმცა პოლიციის კორდონი მათ ამის საშუალებას არ აძლევს.

კონტრაქციის მართავენ ულტრა-ნაციონალისტური ჯგუფები, მათ შორისაა გიორგი გაბედავა. ცოტა ხნის წინ ისინი პოლიციამ ჭანტურიას ქუჩაზე შეაჩერა და რუსთაველის გამზირზე ასვლის საშუალება არ მისცა, თუმცა პარკის მეორე მხრიდან, მსვლელობით ქაშუეთის ეკლესიისკენ ამოვიდნენ.