ამერიკელ კომპოზიტორს ჯონ უილიამსს მსოფლიოს მასშტაბით ჰყავს ფანები, რომლებიც მისი მუსიკით არამარტო ემოციებით ივსებიან, არამედ მისი ჯადოსნური ჰანგები ცხოვრების ბოლომდე მიჰყვებათ.

მსმენელების გარდა, არიან ახალგაზრდა მუსიკოსებიც, რომლებიც თავისი შესრულებით საყვარელ არტისტთან ცდილობენ დაახლოებას.

13 წლის ნიჭიერი მესაყვირის, ბრიუს ჰაიაშისთვის, როგორც ჩანს, საკმარისი არ იყო საზოგადოების წინაშე წარდგენა და გადაწყვიტა, უფროს მეგობართან ერთად საყვარელი კომპოზიტორის სახლს წვეოდა.

რამდენიმე დღის წინ, მან და მაიკლ მილერმა ვარსკვლავური ომებისთვის დაწერილი კომპოზიცია უილიამსის სახლთან შეასრულეს. ვიდეოში ჩანს, რომ რამდენიმე წუთში 84 წლის კომპოზიტორი ეზოში გამოდის და პატარა მუსიკოსს ეგებება.