"Miha hamodi! Miha martla hamodi! რას გვატყუებ hemo zmao?!" - ასე გამოეხმაურა ყოფილი პრემიერ-მინისტრის, ბიძინა ივანიშვილის შვილი და მომღერალი ბერა ივანიშვილი მესამე პრეზიდენტის, მიხეილ სააკაშვილის ბრალდებას.

მიხეილ სააკაშვილმა ბერა ახალი სიმღერისთვის გააკრიტიკა და ეკლესიაზე თავდასხმაში დაადანაშაულა.

"[ბიძინა] ივანიშვილთან რამდენიმე შეხვედრა იმით დამამახსოვრდა,რომ ძალიან აგრესიულობდა ეკლესიაზე და პატრიარქზე. ახლა მისი მთავარი სპიკერი რეპით გამოთქვამს ამ ყველაფერს", - წერს სააკაშვილი ფეისბუქზე.

სავარაუდოდ, სააკაშვილი გულისხმობდა სიმღერის იმ მონაკვეთს, სადაც ბერა ამბობს:

"მე არ ვიცი რას იკადრებს კაცი კაბით, ვინც შენს საიდუმლოს იბარებს".

ბრალდებებზე საპასუხოდ ბერა ივანიშვილმა აღნიშნა, რომ მისი ოჯახი მართლმადიდებლურ რელიგიაზე დაფუძნებული ღირებულებებით ცხოვრობს. მისივე თქმით, მის ოჯახს ბევრი ახალი ეკლესიის მშენებლობასა და ძველი ეკლესია-მონასტრების აღდგენაში მიუღია მონაწილეობა:

"ჩემს სულიერებაშიც დიდი ეჭვი შეიტანა ოდესღაც ეკლესიების დამრბევმა და რწმენაზე მოქილიკემ - ესეც შევუნდოთ!"