საქარველოს პარლამენტის თავმჯდომარის ირაკლი კობახიძის განცხადებით, ნარკოპოლიტიკის კანონპროექტთან დაკავშირებით მმართველ გუნდში აზრთა სხვადასხვაობაა და ახლა დეპუტატების მთავარი ამოცანა, საგაზაფხულო სესიის დასრულებამდე, პოზიციების შეჯერება და კანონპროექტის მიღებაა.

"ინტენსიური განხილვის რეჟიმში საგაზაფხულო სესიის დასრულებამდე კანონპროექტის მიღებას მოვასწრებთ", - განაცხადა ირაკლი კობახიძემ.

მისი თქმით, მთავარი მიზანი დაბალანსებული ნარკოპოლიტიკის შემუშავებაა.

"ჩვენი მიზანია შემცირდეს ნარკოტიკების მოხმარება და ჩვენი მიზანია, რომ სისხლის სამართლებრივი პოლიტიკა რაციონალური იყოს. ჩვენ აპრიორი არც გამკაცრებისკეს და არც ლიბერალიზაციისკენ არ ვიხრებით, მთავარია იყოს დაბალანსებული პოლიტიკა და მთავარია, რომ ამ ორ მიზანს მივაღწიოთ", - განაცხადა ირაკლი კობახიძემ.

მისი თქმით, დეპუტატები იმსჯელებენ და თუ იმ მიმართულებით წავლენ, რომელიც ნარკოტიკების მოხმარებას შეამცირებს, ეს იქნება მკაცრი თუ ლიბერალური პოლიტიკა.

ბოლო ორ კვირაში უცნობი ნარკოტიკული საშუალების მოხმარებით 5 ადამიანი გარდაიცვალა, ინტოქსიკაციის ნიშნებით კი სამედიცინო დაწესებულებაში 10-მდე ადამიანი გადაიყვანეს.

შშს-მ 8 მაისს გამართულ ბრიფინგზე განაცხადა, რომ ნარკოტიკების ონლაინგზით გავრცელების მარშრუტი დაადგინა და ბრალდებულები დააკავა.

ნარკოტიკების მომხმარებელთა ასოციაციამ პრესკონფერენცია გამართა და განაცხადა, რომ თუ პარლამენტი ნარკოპოლიტიკის რეფორმას დროულად არ განახორციელებს შიმშილობას დაიწყებენ.