სახელმწიფო უსაფრთხოების სამსახურისგან მიღებული გაფრთხილების მიუხედავად, დღეს, 9 მაისს ვალერი კვარაცხელია და პარტია სოციალისტები უცნობი ჯარისკაცის საფლავთან საბჭოთა სიმბოლიკით მაინც მივიდნენ.

როგორც ადგილიდან On.ge-ს ჟურნალისტი ყვება, ვალერი კვარაცხელია სიტყვით გამოდის, საქართველოს ოკუპანტ ქვეყანასთან, რუსეთთან ურთიერთობის აღდგენაზე საუბრობს.

ადგილზე მისულია საპატრულო პოლიცია, თუმცა ისინი ჯერ არ მოქმედებენ.

ფოტო: გვანცა ნემსაძე / On.ge

სოციალისტური საქართველო სახელმწიფო უსაფრთხოების სამსახურმა წერილობით გააფრთხილა, რომ თუკი 9 მაისს საბჭოთა სიმბოლიკას გამოიყენებენ, სამართალდამცველები კანონით გათვალისწინებულ ნორმებს მიმართავენ.

განახლება: On.ge-ს შინაგან საქმეთა სამინისტროში განუცხადეს, რომ აქციაზე დაკავებულია სამი პირი.

საბჭოთა სიმბოლიკის გამოყენების აკრძალვა

"თავისუფლების ქარტია საქართველოს კანონის მე-7 მუხლის მე-6 პუნქტის მოთხოვნის შესაბამისად მოგმართავთ, არ დაუშვათ და აღმოფხვრათ ზემოხსენებულ ღონისძიებებზე [9 მაისს] კომუნისტური ტოტალიტარული სიმბოლიკის გამოყენება, წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ნორმები", - წერია სუს-ის წერილში.

აღნიშნულ წერილს ვალერი კვარაცხელია ფეისბუქის საკუთარ გვერდზე ავრცელებს და მის მომხრეებს მოუწოდებს 9 მაისს დილის 9 საათზე, ვაკის პარკში, უცნობი ჯარისკაცის საფლავთან შეიკრიბონ.

ადმინისტრაციულ სამართალდარღვევათა კოდექსით, გაფრთხილების პირობების შეუსრულებლობა ან არასათანადოდ შესრულება გამოიწვევს უფლებამოსილი პირის დაჯარიმებას 1 000 ლარის ოდენობით.