მაესტროს დამფუძნებლები მაკა ასათიანი და გია გაჩეჩილაძე რამდენიმეთვიანი დაპირისპირების შემდეგ, რიგ საკითხებზე შეთანხმდნენ, რომელთაც On.ge უცვლელად გთავაზობთ:

  1. ლოგო და სახელი დაუბრუნდეს ეთერს;
  2. მხარეებმა შეწყვიტონ საჯარო განცხადებების გაკეთება მოლაპარაკების დასრულებამდე;
  3. მოლაპარაკების პერიოდში ვიწყებთ კონსულტაციას ტოპ მენეჯმენტის ერთობლივად ფორმირებაზე;
  4. უმოკლეს ვადაში მოხდეს მიმდინარე ფინანსური ვალდებულებების უზრუნველყოფა;
  5. მოლაპარაკების პერიოდში დროებით ადმინისტრატორებად დაინიშნოს ორივე მხარის წარმომადგენელი, ყოფილი ფინანსური დირექტორი-თემურ გაჩეჩილაძე და გია გაჩეჩილაძის ფინანსური კონსულტანტი-ზვიად ზუბიაშვილი.

განცხადების ავტორები იმედს გამოთქვამენ, რომ მოლაპარაკება ჩიხში არ შევა და ყველა მხარე გამოიჩენს სურვილს, ტელევიზია და თანამშრომლები, რომლებიც უწყვეტ მაუწყებლობას უზრუნველყოფენ, დავას არ შეეწირონ.

საჯარო რეესტრის 2016 წლის 1 თებერვლის ამონაწერის მიხედვით, სტუდია მაესტროს საკონტროლო პაკეტის 55%-ის მფლობელი გიორგი გაჩეჩილაძე გახდა. 4 თებერვალს, კომპანიის პარტნიორთა კრებაზე ბაია გაბადაძე დირექტორის თანამდებობიდან გადააყენეს, რასაც მისი მხრიდან პროტესტი მოჰყვა. გიორგი გაჩეჩილაძემ ახალ დირექტორად თავისი ძმა, ლევან გაჩეჩილაძე წარადგინა. წილების თავიდან გადანაწილებამ არხის დამფუძნებლებს შორის უთანხმოება გამოიწვია.