პრეზიდენტის ადმინისტრაციის უფროსის გიორგი აბაშიშვილის განცხადებით, ქართულმა ოცნებამ პრეზიდენტის მიმართ წაყენებულ კორუფციულ ბრალდებებთან დაკავშირებით, ვერც პროკურატურის მიმართვა და ვერც იმპიჩმენტის დაწყება ვერ გაბედა:

"დღეს, პარტია ქართულ ოცნებას პრეზიდენტ მარგველაშვილის შიში აერთიანებს. ჩვენ ვნახეთ, რომ პრეზიდენტის პარლამენტში გამოსვლამდე ქართული ოცნება, როგორც პოლიტიკური პარტია, ფაქტობრივად დაიშალა. სწორედ ამ შიშის გამო იყო ის, რომ მათ არ მისცეს საშუალება პრეზიდენტს მონაწილეობა მიეღო საქართველოს პარლამენტში დებატების ფორმატში. სწორედ ამ შიში გამო, მათ კორუფციასთან დაკავშირებული, უმძიმესი ბრალდება წაუყენეს საქართველოს პრეზიდენტს".

პარლამენტის თავმჯდომარემ ირაკლი კობახიძემ გიორგი მარგველაშვილი შეწყალების უფლების ბოროტად გამოყენებაში დაადანაშაულა. პრეზიდენტის პოლიტიკურმა მდივანმა ფიქრია ჩიხრაძემ პროკურატურისაგან პარლამენტის თავმჯდომარის განცხადების საფუძველზე გამოძიების დაწყება მოითხოვა. მისი თქმით, ირაკლი კობახიძე უნდა გამოცხადდეს პროკურატურაში და სამართალდამცავ ორგანოებს მიაწოდოს ინფორმაცია, რასაც იგი ფლობს პრეზიდენტთან დაკავშირებით.