პარლამენტის ადამიანის უფლებათა კომიტეტის თავმჯდომარეს, სოფო კილაძეს პატიმართა შეწყალების კომისიისთვის წერილობით არ მიუმართავს. ამის შესახებ On.ge-ს მიერ საქართველოს პრეზიდენტის ადმინისტრაციიდან საჯარო ინფორმაციის სახით მიღებული დოკუმენტით ირკვევა.

პრეზიდენტის ადმინისტრაციის ინფორმაციით, ამავე კომიტეტის ყოფილმა ხელმძღვანელმა, ეკა ბესელიამ თანამდებობაზე მუშაობის დროს შეწყალების კომისიას 609-ჯერ მიმართა. ბესელია წერილების გაგზავნას თავისი თანამდებობით ხსნიდა.

On.ge-მ საკითხის გადამოწმება სოფო კილაძესთან და პრეზიდენტის ადმინისტრაციასთან კიდევ ერთხელ ეკა ბესელიას მიერ გავრცელებული განცხადების შემდეგ სცადა. ადმინისტრაციაში საჯარო ინფორმაციის სახით გაცემული ინფორმაცია კიდევ ერთხელ დაადასტურეს. სოფო კილაძემ არც სატელეფონო ზარებს უპასუხა და არც პრესსამსახურის საშუალებით სცადა კითხვებზე პასუხის გაცემა.

გამოცემას სოფო კილაძისგან აინტერესებდა:

  • რატომ არ არის მისი სახელით პრეზიდენტის ადმინისტრაციაში წერილები გაგზავნილი;
  • აგზავნიდა თუ არა წერილებს და დაახლოებით რამდენი წერილი აქვს გაგზავნილი.

სოფო კილაძემ შეწყალების კომისიასთან დაკავშირებით ისაუბრა სხვა მედიასაშუალებების წარმომადგენლებთან.

"იგივე მაჟორიტარები, იგივე სხვა დეპუტატები არიან ხალხის წარმომადგენლები საქართველოს საკანონმდებლო ორგანოში, პარლამენტში. ბუნებრივია, სხვადასხვა საკითხებზე, მათ შორის შეწყალების საკითხებზე, ისეთ საკითხებზე, რომელიც დეპუტატს თავად, თავისი კომპეტენციიდან გამომდინარე არ შეუძლია, რომ გადაწყვიტოს მაინც მიმართავენ მოქალაქეები და დეპუტატი ახდენს შემდეგ ამაზე რეაგირებას", - განუცხადა სოფო კილაძემ რუსთავი 2-ს.

On.ge-მ გუშინ, 3 მაისს საქართველოს პრეზიდენტის ადმინისტრაციიდან მიღებულ საჯარო ინფორმაციაზე დაყრდნობით მასალა მოამზადა. მიღებული დოკუმენტიდან ირკვეოდა, რომ ეკა ბესელიას გარდა, 2012 წლიდან 2018 წლის მარტის ჩათვლით შეწყალების კომისიას 20-ზე მეტჯერ შეწყალებასთან დაკავშირებით დეპუტატებმა მანანა კობახიძემ (38), გედევან ფოფხაძემ (27), ლაშა თორდიამ (26), ჯონდი ბაღათურიამ (23) და დიმიტრი ლორთქიფანიძემ (22) მიმართეს. იმ დეპუტატებს შორის, რომლებმაც მსგავსი შინაარსის წერილები გააგზავნეს პრეზიდენტის ადმინისტრაციაში მოხვდნენ მოქმედი პარლამენტიდან ყველა პარტიის წარმომადგენლები.

ამავე თემაზე: ეკა ბესელიამ შეწყალების კომისიას 600-ზე მეტჯერ მიმართა