საქართველოს პარლამენტის თავმჯდომარემ, ირაკლი კობახიძემ პრეზიდენტის მოხსენების შეფასებისას განაცხადა, რომ მოქმედი კონსტიტუციის თანახმად, პრეზიდენტი უნდა იყოს არა პოლიტიკური ლიდერი, არამედ გამაერთიანებელი.

მისივე შეფასებით, გასული ხუთი წლის განმავლობაში გიორგი მარგველაშვილის მხრიდან ვერ მოისმინეს ვერცერთი დასამახსოვრებელი მოხსენება, რაც პარლამენტის თავმჯდომარის თქმით, სამწუხაროა. ირაკლი კობახიძემ აღნიშნა, რომ გამაერთიანებლის ნაცვლად, პრეზიდენტი რიგითი ოპოზიციონერი პოლიტიკოსი გახდა.

"სამწუხაროდ, გასული ხუთი წლის განმავლობაში, ჩვენ ვერ მოვისმინეთ ვერცერთი დასამახსოვრებელი მოხსენება ბატონი გიორგი მარგველაშვილის მხრიდან, რაც არის ძალიან სამწუხარო. კიდევ ერთხელ გავიმეორებ, რომ ამ შემთხვევაშიც, ბატონმა გიორგიმ ხელიდან გაუშვა შანსი, რომ დაემკვიდრებინა ახალი ტრადიცია ჩვენს პოლიტიკურ ცხოვრებაში და ჩვენს კონსტიტუციურ სისტემაში. ნაცვლად იმისა, რომ პრეზიდენტი გამხდარიყო გამაერთიანებელი, ის გახდა რიგითი ოპოზიციონერი პოლიტიკოსი და მისი მოხსენებებიც, მათ შორის, დღევანდელი მოხსენებაც, იყო რიგითი ოპოზიციონერი პოლიტიკოსის მოხსენება, რაც არის ძალიან სამწუხარო მოვლენა“,- განაცხადა ირაკლი კობახიძემ.

ამავე თემაზე:ირაკლი კობახიძე: საქართველოს პრეზიდენტი არ უნდა ამბობდეს "აფხაზეთსა და ოსეთს", შემაშფოთებელია