საქართველოს პარლამენტის თავმჯდომარის ირაკლი კობახიძის განცხადებით, საქართველოს პრეზიდენტი, რომელიც კონსტიტუციის თანახმად, თუნდაც სიმბოლურად, არის კონსტიტუციის გარანტი, ინსტიტუტების გარანტი, არ უნდა ამბობდეს "აფხაზეთს და ოსეთს", როდესაც ის საუბრობს ცხინვალის რეგიონზე.

"საქართველოს პრეზიდენტი, რომელიც კონსტიტუციის თანახმად, თუნდაც სიმბოლურად, არის კონსტიტუციის გარანტი, ინსტიტუტების გარანტი, არ უნდა ამბობდეს აფხაზეთს და ოსეთს, როდესაც ის საუბრობს ცხინვალის რეგიონზე. ეს არის ძალიან შემაშფოთებელი მოვლენა, როდესაც ჩვენ ვსაუბრობთ საქართველოს პრეზიდენტზე, საქართველოს სახელმწიფოს მეთაურზე, ქვეყნის კონსტიტუციური სისტემის თუნდაც სიმბოლურ, მაგრამ გარანტზე", - განაცხადა ირაკლი კობახიძემ პრეზიდენტ მარგველაშვილის ყოველწლიური მოხსენების შეფასებისას.

პარლამენტის თავმჯდომარის თქმით, მოქმედი კონსტიტუციის თანახმად, პრეზიდენტი უნდა იყოს არა პოლიტიკური ლიდერი, არამედ გამაერთიანებელი.

"სამწუხაროდ, გიორგი მარგველაშვილმა ამ კონსტიტუციური ტრადიციის დამკვიდრების შანსი ხელიდან გაუშვა", - განაცხადა ირაკლი კობახიძემ.

პარლამენტის თავმჯდომარის თქმით, ამ ტრადიციის შემადგენელი ნაწილი უნდა გამხდარიყო პრეზიდენტის მოხსენებაც, რომელსაც ქვეყნის პოლიტიკურ ცხოვრებაში განსაკუთრებული დატვირთვა ჰქონოდა.

პარლამენტის თავმჯდომარემ აღნიშნა, რომ კოლეგების მიერ გამოთქმულ კრიტიკულ შეფასებებს იზიარებს. ირაკლი კობახიძის განცხადებით, იყო მრავალი ნიუანსი, რომელიც კრიტიკას იმსახურებდა.

"დღეს, სამწუხაროდ, მხოლოდ ერთხელ, მხოლოდ "პატრიოტთა ალიანს" გამოსტყუა ტაში ბატონმა გიორგი მარგველაშვილმა მისი მოხსენების მსვლელობის დროს და რამდენჯერმე გამოსტყუა ტაში საკუთარ ადმინისტრაციას. ეს არის ძალიან სამწუხარო მოვლენა. მე ვისურვებდი, რომ მომავალში, როდესაც მოხსენებით წარსდგება პრეზიდენტი საქართველოს პარლამენტის წინაშე, მას უპასუხოს აპლოდისმენტებით ყველა პოლიტიკურმა ძალამ, რომელიც არის წარმოდგენილი პარლამენტში, ყველა კონსტიტუციურმა ორგანომ, ყველა იმ ადამიანმა, რომელიც იჯდება პარლამენტის სხდომათა დარბაზში", - განაცხადა ირაკლი კობახიძემ.