გირჩის ხელმძღვანელის, ზურა ჯაფარიძის განცხადებით, ბიბლიური თავისუფლების მთავარი მღვდელმსახური და გირჩის წევრი, ნიკა ობოლაძე დააკავეს.

როგორც ჯაფარიძემ On.ge-ს-თან აღნიშნა, ნიკა ობოლაძე, ფაქტობრივად, ბიბლიური თავისუფლების პატრიარქია და მის გარეშე რელიგიურ ორგანიზაციას ფუნქციონირება გაუჭირდება.

დღეს, 2 მაისს, თბილისში, პარტია გირჩის ოფისის მახლობლად, სამოქალაქო ფორმით მისულმა შსს-ს თანამშრომლებმა ერთი პირი დააკავეს.

გირჩის წევრების ცნობით, მათ ფანჯრიდან დაინახეს, რომ პირი ძირს დააწვინეს და ამ ფორმით ცდილობდნენ დაეკავებინათ. მათივე ინფორმაციით, შსს-ს წარმომადგენლები აცხადებდნენ, რომ მათ ოპერატიული ინფორმაციის საფუძველზე უნდა გადაეყვანათ ის ნარკოტესტირებაზე.

როგორც On.ge-ს ჟურნალსიტი ადგილიდან იუწყება, დაკავებული პირი განყოფილებიდან გამოიყვანეს და ნარკოტესტირებაზე გადაიყვანეს. ის უარს აცხადებს ბიოლოგიური მასალის ჩაბარებაზე.

პოლიციის შენობასთან მისულმა გირჩის წევრებმა ქოთანი მიიტანეს, რომელშიც, როგორც თვითონ ამბობენ, მარიხუანაა დარგული. ცოტა ხნის შემდეგ, შენობიდან გამოსულმა პოლიციელმა ახსნა-განმარტების გარეშე განყოფილებაში შეიყვანა ნიკა ობოლაძე, რომელსაც ხელში ქოთანი ეჭირა. გირჩის წევრები ამბობენ, რომ ობოლაძე ქოთნის გამო მარიხუანიანი ქოთნის გამო დააკავეს, რომელიც ყველას ეკუთვნოდა.

როგორც On.ge-ს ჟურნალისტი ამბობს, პოლიციის შენობაში გირჩის წევრებსა და ჟურნალისტებს შესვლის უფლებას არ აძლევენ. ნიკა ობოლაძესთან შესვლა მხოლოდ იურისტმა იაგო ხვიჩიამ შეძლო.

On.ge-ს შინაგან საქმეთა სამინისტროსგან ამ დრომდე არ მიუღია ინფორმაცია.