სერჟ სარგსიანის გადადგომის შემდეგ სომხეთის მთავრობას ვიცე-პრემიერი, კარენ კარაპეტიანი, უხელმძღვანელებს. ამის შესახებ ინფორმაცია სომხეთის მთავრობის ოფიციალურ გვერდზე გამოქვეყნდა.

ვინაიდან სარგსიანმა უარი თქვა თანამდებობაზე, კანონით მისი მოვალეობა ვიცე-პრემიერმა უნდა შეასრულოს.

"ნიკოლ პაშინიანი მართალი იყო, მე ვცდებოდი", - სარგსიანმა თანამდებობა ამ სიტყვებით დატოვა.

ერევანში 13 აპრილიდან საპროტესტო აქციები იმართებოდა. ქალაქის ქუჩებში ათასობით ადამიანი სარგსიანის გადადგომას ითხოვდა. წყლის ჭავლის, ხელკეტების, მავთულხლართების, ხმოვანი ყუმბარების და ასეულობით დაკავებულის მიუხედავად პროტესტი სარგსიანის გადადგომამდე არ შეწყდა. გადადგომის შემდეგ კი სომხეთის სხვადასხვა ქალაქებში საზეიმო მსვლელობები გაიმართა.