აგარის ქარხნის თანამშრომლები მთავრობის კანცელარიასთან მივიდნენ. ისინი ხელისუფლებას მოთხოვნებს უყენებენ და აგარის შაქრის ქარხნის ამუშავებას მოითხოვენ.

აქციის მონაწილეების თქმით, ისინი შაქრის ქარხნის გარეშე ოჯახებს ვერ არჩენენ, რადგან სამსახურის სხვა ალტერნატივა არ აქვთ.

აგარელების აქციას სოლიდარობის მიზნით, სვანეთში ჰესების მშენებლობის აკრძალვის მომხრეები შეუერთდნენ.

6-თვიანი იძულებითი მოცდენის შემდეგ, ისინი ქარხნის ამუშავებას და საკითხში მთავრობის ჩართულობას მოითხოვენ.

ფეხით ჩამოსულ აქციის მონაწილეებს აგარიდან ჩამოსული სხვა მოქალაქეები და ადგილობრივი აქტივისტები შეუერთდნენ.

თბილისში ჩამოსვლამდე აქციის მონაწილეებმა ფეხით 110 კილომეტრი დაფარეს. მსვლელობის დროს ორი პირი ცუდად გახდა. მიუხედავად ჯანმრთელობის მდგომარეობისა, მათ უარი თქვეს სახლში დაბრუნებაზე და მსვლელობა გააგრძელეს.

აგარაში შაქრის ქარხნის დახურვას ადგილობრივები ორი თვის განმავლობაში აპროტესტებდნენ.