მშობლების ნაწილი ბათუმის #14 საბავშვო ბაღს ბავშვის უფლებების დარღვევაში ადანაშაულებს. მათი თქმით, ანალიზის აღების დროს მათი შვილები სხვების თანდასწრებით გააშიშვლეს. ერთ-ერთი მშობელი ამბობს, რომ პროცედურის დროს ჰიგიენური ნორმები დარღვეული იყო.

მშობლის თქმით, როგორც კანონიერი წარმომადგენელი, პროცედურის შესახებ ინფორმირებული არ იყო.

ბათუმის ბაღების გაერთიანების დირექტორის მოვალეობის შემსრულებლის, მამუკა შამილიშვილის განმარტებით, ჰელმიტებზე, ანუ პარაზიტ ჭიებზე გამოკვლევები ყოველწლიურად ტარდება:

"ბავშვმა იტირა პროცედურის დასრულების შემდეგ და მშობელმა, როგორც ჩანს, გადაწყვიტა, რომ ეს დაკავშირებულია გამოკვლევასთან".

პროცედურის კანონიერად ჩატარებაზე საუბრობს #14 ბაღის გამგე, მაია ხუციშვილი. მისი თქმით, ბიჭები და გოგოები ცალ-ცალკე ჰყავდათ გაყვანილი და პროცედურამაც ზეწოლის გარეშე ჩაიარა.

შემთხვევას სწავლობს სახალხო დამცველის აპარატი. შინაგან საქმეთა სამინისტროს ინფორმაციით, დაწყებულია გამოძიება სისხლის სამართლის კოდექსის 126-ე მუხლით, რაც ფიზიკურ ძალადობას გულისხმობს.