ევროპული საქართველო ქალთა მიმართ ძალადობის წინააღმდეგ საკანონმდებლო ინიციატივით გამოდის. ინიციატივის მიხედვით, შემაკავებელი ორდერის გამოწერის შემდეგ მოძალადე 48 საათით უნდა დააკავონ.

პარტიის წევრის ელენე ხოშტარიას თქმით, ამ დროში შესაძლებელია მსხვერპლის ოჯახიდან განრიდება.

"საერთაშორისო გამოცდილებაც აჩვენებს, რომ პოლიციის გამოძახებიდან 48 საათი ყველაზე საშიში დროა ძალადობის განმეორებისთვის ან უარესი დანაშაულის ჩადენისთვის. ამ დროის შემდეგ ჩაერევა სასამართლო და ყველაფერი წავა იმ წესის მიხედვით, რაც ჩვენს ქვეყანაშია დადგენილი", - აცხადებს ხოშტარია.

გუშინ,13 აპრილს თბილისში 25 წლამდე ასაკის ქალი, ორი არასრულწლოვანი შვილის თანდასწრებით მოკლეს.

შინაგან საქმეთა სამინისტროს ინფორმაციით, მკვლელობამდე გარდაცვლილმა პოლიციას მიმართა და დედასთან ერთად, სავარაუდო დამნაშავისთვის შემაკავებელი ორდერის გამოცემა მოითხოვა.