Freedom House-ის 2018 წლის ანგარიშის მიხედვით, მედიის დამოუკიდებლობის მაჩვენებელი საქართველოში 0,25 ერთეულით შემცირდა. ამით მონაცემები 2009 წლის მაჩვენებელს გაუტოლდა. Freedom House-ის ამ დასკვნას არ ეთანხმებიან მმართველი პარტია, ქართული ოცნება, საზოგადოებრივი მაუწყებელი და იმედი.

მმართველი პარტია

ქართული ოცნების აღმასრულებელი მდივანი და პარლამენტის თავმჯდომარე, ირაკლი კობახიძე ანგარიშში გამოთქმულ მოსაზრებებს, მედიის თავისუფლებაზე, "ღიმილისმომგვრელს" უწოდებს. კობახიძის შეფასებით, მედიის თავისუფლების სფეროში 2012 წლისა და დღევანდელი რეიტინგების იდენტობა ანგარიშის ტენდენციურობაზე მეტყველებს.

მმართველი პარტიის ლიდერი წინა ხელისუფლების პერიოდს იხსენებს და ამბობს, რომ 2012 წელს ხელისუფლების სრული მონოპოლია იყო მედიაგარემოზე.

"2004-12 წლებში სამივე საერთო ეროვნულ მაუწყებელზე - რუსთავი 2-ზე, იმედსა და საზოგადოებრივ მაუწყებელზე, უკანონო გზით, გავლენა მოიპოვა მიხეილ სააკაშვილმა და ერთიანმა ნაციონალურმა მოძრაობამ. სამივე არხი ასრულებდა ხელისუფლების რუპორის ფუნქციას და უზრუნველყოფდა ე.წ. ბრეინვოშინგს, ანუ ტვინის გამორეცხვას ხელისუფლების სასარგებლოდ".

იმედი

იმედის ჰოლდინგი Freedom House-ის ანგარიშს გამოეხმაურა. მათი განცხადებით, 2007 წლის ნოემბრიდან 2012 წლის ბოლომდე, როცა ნაციონალური მოძრაობა ხელისუფლებაში იყო, იმედი მმართველი პარტიის საკუთრება იყო და მის მიმართ კრიტიკა არ ისმოდა.

"ვიმედოვნებთ, რომ მომავალში, ისეთი ავტორიტეტული ორგანიზაცია, როგორიც Freedom House არის გამონახავს უფრო მაღალი კომპეტენციის თანამშრომლებს, რომლებიც მას კვალიფიციური ანგარიშის შედგენაში დაეხმარებიან და ეს ანგარიში სწორ და რეალურ ფაქტებზე დაყრდნობით ასახავს საქართველოში მედია თავისუფლების ხარისხსა და ტენდენციებს, რითაც Freedom House დარჩება მედიის თავისუფლების სადარაჯოზე, რაც საქართველოს სამწუხარო გამოცდილების გათვალისწინებით, ესოდენ მნიშვნელოვანია გარდამავალი დემოკრატიის ქვეყნისათვის", - აღნიშნულია ჰოლდინიგის მიერ გავრცელებულ განცხადებაში.

საზოგადოებრივი მაუწყებელი

ანგარიშს ასევე გამოეხმაურა საზოგადოებვიი მაუწყებლის გენერალური დირექტორი, ვასილ მაღლაფერიძე. მისი თქმით, Freedom House პატივსაცემი ორგანიზაციაა, მაგრამ ვინც ორგანიზაციას ასეთი ინფორმაცია მიაწოდა, კეთილსინდისიერება არ გამოიჩინა:

"ნებისმიერი შეფასება არის საინტერესო, მაგრამ ნებისმიერ შეფასებას სჭირდება გადამოწმება. ორგანიზაციის ანგარიშში ვკითხულობთ, რომ 2017 წელს მედიის მდგომარეობა საქართველოში ისეთივე იყო, როგორც 2009, 2010, 2011 და 2012 წლებში. ვფიქრობ, არა მხოლოდ საქართველოში მცხოვრები, არამედ, ყველა, ვისაც თუნდაც საქართველოს გვერდზე გაუვლია, ამ ინფორმაციას უბრალოდ, არ დაიჯერებს და ეს ძალიან იოლად შეუძლიათ, შეამოწმონ.

აღარ ვიტყვი, რა დღეში იყო მედია, აღარ გავიხსენებ დარბევებს, კიდევ უფრო სამარცხვინო ანტენების დაჭერას, როგორ გადასცემდნენ ძირითადი მედიასაშუალებები ერთსა და იმავე ინფორმაციას და ასე შემდეგ. თუ ვინმეს მიაჩნია, რომ ეს ყველაფერი ხდებოდა 2017 წელსაც, ის უბრალოდ არაკომპეტენტურია ან შეცდომაშია შეყვანილი".

საქართველოს ჟურნალისტური ეთიკის ქარტიის მიერ ჩატარებული 2017 წლის საარჩევნო მონიტორინგის მიხედვით, ხელისუფლების მიმართ რბილი, არამოდარაჯე პოზიციით ხასიათდებოდა საზოგადოებრივი მაუწყებლის პირველი არხი და ტელეკომპანია იმედი.

"ამ ორი არხის სარედაქციო პრიორიტეტები არჩევნების შემდგომ პერიოდში მაქსიმალურად დაახლოვდა. ისინი ზოგიერთ შემთხვევაში, ხელისუფლების მიმართ მომზადებული ლოიალური სიუჟეტებით განსაკუთრებით ჰგავდნენ ერთმანეთს", - ვკითხულობთ ანგარიშში.