ტურინის იუვენტუსის მთავარი გოლკიპერი ჯანლუიჯი ბუფონი რეალთან ორმატჩიან დაპირისპირებაში საბოლოო მარცხს და მოედნიდან გაძევებას გამოეხმაურა.

მატჩის ბოლო წუთებში, როცა ტურინელები ანგარიშით 0:3-ს იგებნდნენ, მთავარმა არბიტრმა მაიკლ ოლივერმა იუვენტუსის კარში პენალტი დანიშნა, შემდეგ კი გაცხარებული ბუფონი, რომელიც მსაჯს მივარდა, წითელი ბარათით დასაჯა.

"ეს 10 პროცენტითაც კი არ იყო პენალტი. ვიცი, რომ მომენტი საეჭვო იყო. და საეჭვო მომენტი მატჩის მიწურულს, როცა წინა შეხვედრაში ჩვენ არ დაგვინიშნეს თერთმეტმეტრიანი. ასეთი რამ, უბრალოდ არ შეიძლება".

"გუნდმა მთელი სული და გული დადო და ერთ ადამიანს არ აქვს უფლება, ხაზი გადაუსვას ოცნებას დაუჯერებელ ქამბექზე", - აღნიშნა ბუფონმა.

მისი თქმით, მსაჯს გულის ნაცვლად ნაგვის ურნა აქვს, რადგან ასეთი გადაწყვეტილება მიიღო.

"მკერდში გულის ნაცვლად ნაგვის ურნა უნდა გქონდეს (ასეთი რამის გაკეთებისთვის). თუ ასეთი თამაშის ღირსეულად განსჯის უნარი არ გაქვს, შეგიძლია ცოლ-შვილთან ერთად ტრიბუნებიდან დაესწრო შეხვედრას".

"ორი მატჩის ჯამში რეალმა შემდეგ ეტაპზე გასვლა დაიმსახურა და მათ წარმატებას ვუსურვებ. რეალის წინააღმდეგ თამაში ჩემთვის ყოველთვის პატივი იყო, თუმცა ობიექტურად რომ შევაფასოთ, სულ მცირე, დამატებით დროს მაინც ვიმსახურებდით".