12 აპრილს, 16:00 საათზე, ილიას სახელმწიფო უნივერსიტეტის G106 აუდიტორიაში სახელმწიფო ენის დღესთან დაკავშირებით დისკუსია გაიმართება. სადისკუსიო თემა "სახელმწიფო ენა წარმატებისთვის" იქნება. აღნიშნულ დისკუსიას ილიას სახელმწიფო უნივერსიტეტის ქართულ ენაში მომზადებისა და ინტეგრაციის საგანმანათლებლო პროგრამა, ტოლერანტობის, სამოქალაქო ცნობიერებისა და ინტეგრაციის მხარდამჭერი პროგრამის საუნივერსიტეტო ახალგაზრდული ცენტრი და საბჭოთა წარსულის კვლევის ლაბორატორია "სოვლაბი" გამართავენ.

პროგრამის არაქართულენოვანი სტუდენტები საუნივერსიტეტო კვლევითი პროექტის, "საქართველოს პირველი რესპუბლიკის პროსოპოგრაფიული ბაზა და სოციალური კლასტერების ანალიზი", ბაზაზე ქმნიან XIX საუკუნის ბოლოსა და XX საუკუნის 20-იანი წლების საქართველოს ეთნიკური მრავალფეროვნების ციფრულ ისტორიას. ამასთან, სწავლობენ და სტუდენტური მინიპროექტების სახით აქვეყნებენ დამოუკიდებელი საქართველოს მშენებლობაში არაქართულენოვანი მოსახლეობის ღვაწლის ამსახველ მასალას.

ამ პროგრამის სტუდენტი, მსოფლიოში პირველი მუსლიმი დეპუტატი ქალის, ფარი ხანუმ სოფიევას შთამომავალი, ისმაილ სოფიევი საკუთარ გეგმებზე ისაუბრებს. ის მოყვება, თუ როგორ აპირებს უცნობი ისტორიების კვლევა-ძიებით სამოქალაქო მეხსიერების მატიანის შექმნას. ამავე პროგრამის სტუდენტები, ნარე კაზარიანი და ლილით დავთიანი, წარადგენენ დამოუკიდებელი საქართველოს მეცენატებს, რომელთაც დიდი ღვაწლი მიუძღვით საქართველოს როგორც ქართულ, ისე სომ ხურ საგანმანათლებლო და კულტურულ სფეროში, მათ შორის ახალგაზრდებისთვის უცხოეთში სასწავლებლად სასტიპენდიო ფონდების დაარსებაში.

დისკუსიაზე დასწრება ნებისმიერი მსურველისთვის თავისუფალია.