ქართული ოცნების დეპუტატი, შოთა შალელაშვილი რუსთავი 2-თან სატელეფონო ინტერვიუში ამბობს, რომ მათ პარტიაში ერთი დაჯგუფებაა, რომლიც მართავს პარლამენტს და გადაწყვეტილებებს ერთპიროვნულად იღებს.

"რა თქმა უნდა, ლიდერები გვყავს პარლამენტში, მათ შორის, თავმჯდომარე, ფრაქციის თავმჯდომარე. ქართული ოცნების გუნდში მთავარი პრობლემა ის არის, რომ უმრავლესობის დეპუტატები უფუნქციოდ დარჩნენ", - ამბობს შალელაშვილი და აღნიშნავს იმასაც, რომ მეტი კომუნიკაცია და ფუნქციების გადანაწილებაა საჭირო, რათა არ იყოს წყენისა და განხეთქილების მიზეზი.

დეპუტატი სწორედ ამ მიზეზით ხსნის გედევან ფოფხაძის გადაწყვეტილებას წასვლაზე და ვარაუდობს, რომ მისი უკმაყოფუილება არ არის გამოწვეული ერთი ფაქტორით. შალელიშვილი არც იმას გამორიცხავს, რომ სხვა დეპუტატებმაც მიიღონ საპარლამენტო უმრავლესობის დატოვების გადაწყვეტილება:

"ალბათ დაგროვილია. ვცდილობთ, გუნდის შიგნით ეს ყველაფერი აღმოიფხვრას. თუ ეს მრავლობით ხასიათს მიიღებს, რა თქმა უნდა, ცნობილი გახდება".

გედევან ფოფხაძემ ქართული ოცნების დატოვების შესახებ მას შემდეგ განაცხადა, რაც პარლამენტმა ნინია კაკაბაძე საზოგადოებრივი მაუწყებლის სამეურვეო საბჭოს წევრად აირჩიეს.