სახელმწიფო ქონების ეროვნული სააგენტო შპს ჯი ემ ეფ-ს ანაკლიაში, GEM Fest 2018-ის ჩასატარებლად, მიწის იჯარით გადაცემაზე უარს ეუბნება. სააგენტოში აცხადებენ, რომ მიწის გაცემა მიზანშეწონილი არ არის.

სააგენტოს ცნობით, კომპანია თავის წერილში აღნიშნავდა, რომ ფესტივალის ჩატარებას 9 აგვისტოდან 12 აგვისტოს ჩათვლით გეგმავდნენ და ბილეთების დიდი ნაწილი უკვე გაყიდული იყო:

"ჩვენთვის აბსოლუტურად გაუგებარია ქონების მესაკუთრის თანხმობის გარეშე ელექტორნული ფესტივალის ორგანიზატორების მხრიდან ბილეთების რეალიზაციის პროცესი და მიგვაჩნია, რომ აღნიშნული ფაქტი გამოიწვევს ქართველი და უცხოელი მომხმარებლის შეცდომაში შეყვანას".

ქონების სააგენტო აცხადებს, რომ ანაკლია-განმუხურის ტურისტულ ზონაში მიმდინარე წელს სახელმწიფო პროექტის Check in Georgia-ს ფარგლებში, გარდამავალი პერიოდის განმავლობაში, დაგეგმილია რამდენიმე მუსიკალური აქტივობა:

"ერთი ხანგრძლივი - 4-დღიანი ღონისძიება. ასევე, დაგეგმილია ინოვაციების და სტარტაპ ეკოსისტემის ხელშემწყობი ღონისძიებების ჩატარება, რომელსაც ინოვაციებისა და ტექნოლოგიების სააგენტო უზრუნველყოფს".

სააგენტოს ინფორმაციით, 27 მარტს მათ შპს ჯი ემ ეფ-ის გენერალურმა დირექტორმა, დავით დამენიამ მიმართა. დამენიამ ანაკლია-განმუხურის ტურისტულ ზონაში, უკვე დაგეგმილი ელექტრონული მუსიკის ფესტივალის, GEM Fest 2018-ის ჩასატარებლად სახელმწიფოს საკუთრებაში არსებული მიწის ნაკვეთების იჯარის უფლებით გადაცემა მოითხოვა.

GEM Fest-ის დამფუძნებელი გიორგი სიგუა ამბობდა, რომ თუ საქართველოს მთავრობა 2018 წლის ფესტივალისთვის მიწას იჯარით არ მისცემს, მაშინ ღონისძიებას ოკუპირებულ აფხაზეთში ჩაატარებს.