პრეზიდენტის პრეს-სპიკერი, ეკა მიშველაძე განმარტავს, რომ ვინაიდან გიორგი მარგველაშვილი არის ქვეყნის მთავარსარდალი, მას ყოველთვის ჰქონდა და ექნება საკუთარი შეხედულება თავდაცვის მინისტრთან დაკავშირებით. თუმცა, მიშველაძე არ აკონკრეტებს, მიმდინარეობს თუ არა თავდაცვის უწყების ახალ ხელმძღვანელთან დაკავშირებით რაიმე ტიპის მოლაპარაკება.

მარგველაშვილის პრეს-სპიკერი კოალიციის დაშლის მიზეზებსაც განმარტავს:

"კოალიცია გულისხმობს იდეებისა და ხედვების ირგვლივ გაერთიანებას. თუმცა, 2014 წლის იანვრიდან ასეთი ღირებულებითი გაერთიანების მაგივრად კოალიცია ქართული ოცნების სამუშაო პრინციპად იქცა არა რეფორმების ირგვლივ გაერთიანება, არამედ პიროვნული დაპირისპირება და ინსტიტუტების შესუსტება. სწორედ ასეთმა დღის წესრიგმა გამოიწვია საბოლოოდ კოალიციის დაშლა, ასეთია პრეზიდენტის აზრი ამ საკითხთან დაკავშირებით".

დღეს რესპუბლიკელების მიერ გამართულ ბრიფინგზე ცნობილი გახდა, რომ თავდაცვის მინისტრი, თინა ხიდაშელი და შერიგების საკითხებში სახელმწიფო მინისტრი, პაატა ზაქარეიშვილი თანამდებობებს ტოვებენ. როგორც მოგვიანებით ზაქარეიშვილმა განაცხადა, ქართული ოცნება არ დასთანხმდა რესპუბლიკელების შეთავაზებას მინისტრთა კაბინეტში რესპუბლიკელი მინისტრების დარჩენასთან დაკავშირებით.