ჩინური კოსმოსური სადგური ტიანგონგ-1, რომელიც დედამიწას უნდა დაცემოდა, ატმოსფეროში, წყნარი ოკეანის თავზე დაიწვა. სადგურის ნაწილების უმეტესობამ დედამიწამდე ვერ მიაღწია.

"ტიანგონ 1" რადარებზე

ფოტო: FRAUNHOFER

სადგური, რომლის სახელიც "სამოთხედ" ითარგმნება, 2011 წელს ამოქმედდა და მან სამ მისიას უმასპინძლა. ამ სადგურზე გაემგზავრა პირველი ჩინელი ქალი კოსმონავტი.

2016 წელს ჩინეთის კომოსური სააგენტოს წარმომადგენლებმა სადგურზე კონტროლი დაკარგეს. მას შემდეგ მეცნიერები ობიექტის დაცემის თარიღისა და ადგილის გამოთვლას ცდილობდნენ.

ჩამოვარდნის ზონა ნებისმიერი ადგილი შეიძლებოდა ყოფილიყო ჩრდილოეთის 43 გრადუსსა და სამხრეთის 43 გრადუსს შორის. ამ ზონაში, პორტუგალიასთან, ესპანეთთან, საფრანგეთთან და საბერძნეთთან ერთად, ხვდებოდა საქართველოც.

მეცნიერები გვეუბნებოდნენ, რომ საგანგაშო არაფერი იყო. მათივე განმარტებით, 8,5-ტონიანი სადგური ატმოსფეროში დაიწვებოდა დედამიწაზე კი მხოლოდ ნარჩენები ჩამოცვივდება.