ერთიანმა ნაციონალურმა მოძრაობამ კანონის უზენაესობასთან და ადამიანის უფლებებთან დაკავშირებით დღეს საარჩევნო გეგმა წარმოადგინა, რომლის მთავარი მესიჯებია: ლიბერალური და დანაშაულის პრევენციაზე ორიენტირებული სისხლის სამართლის პოლიტიკა, სახელმწიფოსთან დავისას მოქალაქის უფლებების გაფართოება, პროკურატურის უფლებების შეკვეცა და საპარლამენტო ზედამხედველობის გაზრდა, სასამართლოს დამოუკიდებლობის გაძლიერება და ადამიანის უფლებების დასაცავად ქმედითი მექანიზმების შექმნა.

სისხლის სამართლის პოლიტიკის რეფორმა:

ენმ ამომრჩეველს ჰპირდება, რომ 2017 წლიდან წინასწარი პატიმრობის გამოყენებას რიგ დანაშაულზე შეზღუდავს, მათ შორის ეკონომიკურ დანაშაულზეც:

"უნდა გადაიხედოს არაძალადობრივი და გაუფრთხილებლობით ჩადენილი დანაშაულები და მოხდეს სასჯელის ლიბერალიზაცია, საბოლოო დეკრიმინალიზაციის პერსპექტივით. არ განხორციელდება სისხლის სამართლებრივი დევნა მსუბუქ ნარკოტიკის მოხმარებაზე".

პოლიციის რეფორმა:

ენმ აპირებს ფინანსური სამსახურისა და სახელმწიფო უსაფრთხოების სამსახურის გაუქმებას. გარდა ამისა, პარტია ამბობს, რომ უკანონო ფარული მიყურადებების და პირად ცხოვრებაში ჩარევის გამორიცხვის მიზნით, 2017 წლის იანვრამდე სამართალდამცავი ორგანოებისგან დამოუკიდებელი და საგამოძიებო ფუნქციის არმქონე ტექნიკური სამსახურის შექმნას.

პროკურატურის რეფორმა:

პროკურატურა იქნება მხოლოდ გამოძიებაზე ზედამხედველი და სახელმწიფო ბრალდების მხარდამჭერი. გაიზრდება მისი ანგარიშვალდებულება მას შემდეგ, რაც ამოქმედდება მთავარი პროკურორის შერჩევის ახალი, გამჭვირვალე წესი:

"შეიქმნება პროკურატურისგან დამოუკიდებელი სამსახური, რომელიც გამოიძიებს სამართალდამცავთა მხრიდან დანაშაულის ჩადენის ფაქტებს. აგრეთვე განსაზღვრული ტიპის დანაშაულებს, რომელთაც განსაკუთრებული მნიშვნელობა ექნებათ".

მართლმსაჯულების სისტემის რეფორმა:

ზედა ინსტანციის სასამართლოებში მოიწვევენ კვალიფიციური და მაღალი რეპუტაციის მქონე უცხოელ მოსამართლეებს, რომლებსაც დანიშნავენ გარკვეული ვადით და ეტაპობრივად ჩაანაცვლებენ მათ ადგილობრივი მოსამართლეებით:

"ნაფიც მსაჯულთა სისტემა სისხლის სამართლის ყველა საქმეზე ამოქმედდება, რომელიც სასჯელის სახით ითვალისწინებს 1 წლით ან მეტი ვადით. ასევე განხილულია სამოქალაქო დავების განხილვის ვადების შემცირება, მოსამართლეებისთვის დადგენილი სამწლიანი გამოსაცდელი ვადის გაუქმება".

ენმ-ს თქმით, გარდა ამისა, მოწმეები მხოლოდ მოსამართლეების თანდასწრებით დაიკითხებიან.

თავისუფლების აღკვეთა და შეზღუდვა:

ადამიანის უფლებების დასაცავად შეიქმნება დამოუკიდებელი საზოგადოებრივი მონიტორინგის საბჭო, პარლამენტის, ადგილობრივი და საერთშორისო ორგანიზაციები მონაწილეობით.

სასჯელაღსრულებისა და დროებითი იზოლატორის დაწესებულებაში დამონტაჟებულ კამერებზე წვდომა ექნება სახალხო დამცველსა და პარლამენტის ნდობის ჯგუფს, რომელშიც ფართოდ იქნება წარმოდგენილი ოპოზიცია.

გაიზრდება პატიმრის უფლებები. პარლამენტის დეპუტატს, ყოველგვარი გაფრთხილებისა და შეზღუდვის გარეშე, შიდა რეგულაციის დაცვით შესაძლებლობა ექნება დაუბრკოლებლად შევიდეს სახელმწიფო დაწესებულებაში, მათ შორის ციხეებსა და დროებითი დაკავების იზოლატორში.