საუდის არაბეთის თავდაცვის სამინისტროს პრესსამსახურის განცხადებით, კვირას მათ სახელმწიფოზე იემენის ტერიტორიიდან სარაკეტო თავდასხმა განხორციელდა. ამის შესახებ ინფორმაციას CNN ავრცელებს.

თავდასხმისას გამოიყენეს 7 სარაკეტო დანადგარი. გავრცელებული ინფორმაციით, საუდის არაბეთის რაკეტსაწინააღმდეგო ძალებმა შეძლეს შვიდივე მათგანის განადგურება, თუმცა განადგურებული რაკეტების ნაწილები ჩამოვარდა სხვადასხვა პროვინციებში. ერთ-ერთი რაკეტის ნამსხვრევმა საუდის არაბეთის ერთი მოქალაქის სიცოცხლე შეიწირა. საუდის არაბეთის თავდაცვის სამინისტროს პრესსამსახურის ცნობით, თავდასხმას სულ 4 სამიზნე წერტილი ჰქონდა ქვეყნის ტერიტორიაზე.

ეს არ არის პირველი შემთხვევა, როდესაც იემენის ტერიტორიიდან საუდის არაბეთს სარაკეტო დანადგარებს ესვრიან. წინა თავდასხმას ფატალური შედეგი არ მოყოლია, თუმცა საუდის არაბეთმა საპასუხოდ იემენის დედაქალაქი დაბომბა. ფატალური შედეგით დასრულებულ შეტევას დიდი ალბათობით უფრო მძიმე პასუხი მოჰყვება. საუდის არაბეთი მომხდარში შიიტურ ორგანიზაცია "ჰუტის" ადანაშაულებს, რომელიც იემენის ჩრდილოეთ ტერიტორიებს აკონტროლებს.