ქართული მარშის ლიდერი, სანდრო ბრეგაძე ამბობს, რომ ტელეკომპანია რუსთავი 2-თან მარშის წევრები არ ძალადობდნენ. თუმცა 19 მარტს აქციის დროს ფიზიკური ზეწოლის გამო რუსთავი 2-ის ჟურნალისტ დავით ერაძეს ცხვირიდან სისხლი სდიოდა და ტელეკომპანიის სხვა თანამშრომლების თამთა მურადაშვილისა და გიორგი გაბუნიას მანქანა კი ალყაში ჰყავდათ და აგინებდნენ.

ბრეგაძემ რუსთავი 2-თან საუბრისას განმარტა, რომ აქციის დროს ის ადამიანები არ დაშავებულან, ვისთანაც მათ აქტივისტებს "პრობლემ აჰქონდათ". საუბარია ჟურნალისტ გიორგი გაბუნიაზე. მისი თქმით, რუსთავი 2-ის სხვა თანამშრომლის მსგავსად, დაშავებულები არიან ქართული მარშის წევრები.

"გინება ჩვეულებრივი ამბავი არის და პარლამენტის თუ საკრებულოს სხდომებზე ერთმანეთს ცხვირ-პირს ალეწავენ. მე ვფიქრობ, რომ აბსოლუტურად უსამართლო იქნება ექვს ახალგაზრდას შეეფარდოს პატიმრობა. მაშინ უმაღლესი თანამდებობის პირები კარგა ხნის დაპატიმრებულები უნდა იყვნენ", - თქვა სანდრო ბრეგაძემ.