სამოქალაქო პლატფორმა "არა ფობიას!" 19 მარტს რუსთავი 2-თან განვითარებულ მოვლენებზე სამართალდამცავი ორგანოების რეაგირებას ითხოვს და იქონიონ მკაცრი პოლიტიკა ნებისმიერი იმ ქმედების მიმართ, რომელიც შეიცავს ძალადობას, მიმართულია ჟურნალისტური საქმიანობის ხელის შეშლისა და გამოხატვის თავისუფლების წინააღმდეგ.

პლატფორმაში შემავალი არასამთავრობო ორგანიზაციები აღნიშნავენ, რომ ეს არაა პირველი შემთხვევა, როდესაც ქართული მარშის წევრები მსგავსად მოიქცნენ:

"მათი მხრიდან გამოვლენილი დანაშაულებრივი ხასიათის ქმედებები და თებერვალში დაანონსებული ე.წ. სახალხო პატრულის შემოღების ინიციატივა ცხადჰყოფს, რომ ისინი კვლავაც გააგრძელებენ ნებისმიერი მათთვის მიუღებელი ადამიანის ფიზიკურ შეურაცხყოფას და ეცდებიან განსხვავებული აზრის დანაშაულებრივი გზით ჩახშობას".

მათი თქმით, რუსთავი 2-თან განვითარებული მოვლენები აჩვენებს, რომ სახელმწიფომ ექსტრემიზმთან ბრძოლის პოლიტიკა უნდა დასახოს.

"დაუშვებლად მიგვაჩნია ე.წ. რელიგიური გრძნობების შეურაცხყოფის თავიდან აცილების მოტივით გამოხატვის თავისუფლების შეზღუდვა. გამოხატვის თავისუფლების ძირითად არსს წარმოადგენს სწორედ შესაძლებლობა, გვქონდეს მათ შორის კრიტიკული, შოკისმომგვრელი და თუნდაც შეურაცხმყოფელი აზრის გამოხატვის უფლება", - ნათქვამია განცხადებაში.

მათივე განმარტებით, რელიგიური გრძნობები ვერ იქნება ის საფუძველი, რომელიც გაამართლებს ამგვარ შეზღუდვას:

"ნებისმიერი ასეთი მცდელობა ახალისებს "ინკვიზიციური" წარსულის აღდგენას, რომელიც აუცილებლად იქონიებს მსუსხავ ეფექტს საზოგადოებაში ჯანსაღი კრიტიკის არსებობაზე".

პლატფორმა მიმართავს შსს-ს, რათა უწყება შეხვდეს ადამიანის უფლებების საკითხებზე მომუშავე არასამთავრობო ორგანიზაციებს და გააცნოს, თუ რა ნაბიჯებს დგამს სახელმწიფო სიძულვილით მოტივირებული დანაშაულების წინააღდეგ საბრძოლველად და მიაწოდოს ინფორმაცია ამგვარ დანაშაულებზე გამოძიების მიმდინარეობის შესახებ.

ხელმომწერები:

  • საქართველოს დემოკრატიული ინიციატივა (GDI);
  • თანასწორობის მოძრაობა (Equality Movement);
  • საქართველოს რეფორმების ასოციაცია (GRASS);
  • საერთაშორისო გამჭირვალობა-საქართველო (TI);
  • ტოლერანტობისა და მრავალფეროვნების ინსტიტუტი (TDI);
  • სამართლიანი არჩევნებისა და დემოკრატიის საერთაშორისო საზოგადოება (ISFED);
  • კონსტიტუციის 42-ე მუხლი;
  • საფარი;
  • მედიის განვითარების ფონდი (MDF).

გაიგეთ მეტი: