დაუნის სინდრომის საერთაშორისო დღესთან დაკავშირებით, 50-მა დედამ 4 წლის შვილებთან ერთად კარაოკე ჩაწერა, სადაც ისინი კრისტინა პერის A Thousand Years-ს მღერიან.

დედები ფეისბუქ ჯგუფის წევრები არიან, რომელშიც ის მშობლები არიან გაწევრიანებულნი, რომელთა შვილებიც დაუნის სინდრომით 2013-2014 წლებში დაიბადნენ.

21 მარტისთვის გადაღებულ ვიდეოში, დედები სიმღერას ნიშნების ენით მღერიან. "გვინდოდა ეს ვიდეო ყველას ენახა და მათთვის გვეთქვა, რომ ჩვენი 4 წლის შვილები სხვა თანატოლებს ჰგავნან და მათ არაფრის გამო შევცვლიდით", - ამბობს ერთ-ერთი დედა BBC-სთან საუბრისას.

ვიდეო რამდენიმე დღეში გავირუსდა და ის თავად მომღერალმა კრისტინა პერიმ და Carpool Karaoke-ს წამყვანმა ჯეიმს კორდენმაც გააზიარა.

"ძალიან ბედნიერი ვარ, რომ მათ ჩემი სიმღერა აირჩიეს, ეს საუკეთესო რამაა", - დაწერა მომღერალმა.

"ყველაზე ლამაზი კარაოკეა, ცრემლები მომერია" - წერს კორდენი.

დაუნის სინდრომი გენეტიკური ცვლილებაა, რა დროსაც ნაყოფის უჯრედებში 46-ის ნაცვლად 47 ქრომოსომა ჩნდება. ათასი ბავშვიდან ერთი სწორედ ამ სინდრომით იბადება. იგი პირველად 1866 წელს მეცნიერმა ჯონ დაუნმა აღწერა. განვითარებულ ქვეყნებში მუდმივად მუშაობენ დაუნის სინდრომის მქონე ადამიანთა მიმართ სტიგმის დაძლევაზე. შედეგად, ისინი იღებენ განათლებას, საქმდებიან და ქმნიან ოჯახებს.

2010 წლიდან, ყოველ 21 მარტს მსოფლიო დაუნის სინდრომის საერთაშორისო დღეს აღნიშნავს. საქართველო წელს მეშვიდედ უერთდება მსოფლიო ინიციატივას.