საქართველოს საგარეო საქმეთა სამინისტრო იმედს გამოთქვამს, რომ ჟენევის მომავალ რაუნდზე, მრავალი წლის მანძილზე, რუსეთთან არსებული ჩიხური მდგომარეობიდან გამოსვლას შეძლებენ. ასე გამოეხმაურა საქართველოს საგარეო საქმეთა სამინისტრო რუსეთის საგარეო უწყების პასუხს კვირიკაშვილის განცხადებაზე.

საქართველოს საგარეო საქმეთა სამინისტრო მოუწოდებს რუსეთის ფედერაციას გადადგას ნაბიჯები ტატუნაშვილის ცხედრის დაუყოვნებლივ გადმოსაცემად.

"ჟენევის დისკუსიები არის მნიშვნელოვანი ფორმატი რუსეთ-საქართველოს კონფლიქტის დასარეგულირებლად. იმედს გამოვთქვამთ, რომ ჟენევის მომავალ რაუნდზე ჩვენ შევძლებთ მრავალი წლის მანძილზე არსებული ჩიხური მდგომარეობიდან გამოსასვლელად და კონფლიქტის მშვიდობიანად დასარეგულირებლად კონკრეტული ნაბიჯების გადადგმას", - ნათქვამია საგარეო საქმეთა სამინისტროს განცხადებაში.

რამდენიმე დღის წინ კვირიკაშვილმა რუსეთის ხელისუფლებას განცხადებით მიმართა. მისი თქმით, ქართული მხარე დაინტერესებულია რეალურ პროგრეს მიაღწიონ ჟენევის საერთაშორისო დისკუსიების პროცესში. ასევე, მზადაა პირდაპირი დიალოგისათვის აფხაზებთან და ოსებთან. ამ თვალსაზრისით, პრემიერი მიესალმება რუსეთის კონსტრუქციულ მიდგომასაც.

რუსეთის საგარეო საქმეთა სამინისტრო გიორგი კვირიკაშვილის განცხადებას გამოეხმაურა და განაცხადა, რომ პრემიერ-მინისტრის სურვილს ორმხრივი დიალოგის შესახებ მიესალმებიან.