არჩილ ტატუნაშვილთან ერთად დაკავებულ ლევან ქუტაშვილსა და იოსებ პავლიაშვილს დაკავებიდან 17 დღის შემდეგ ოკუპირებული ახალგორიდან გამოსვლის უფლება მისცეს.

ისინი საქარველოს მიერ კონტროლირებად ტერიტორიაზე, მცხეთაში იმოფებიან თუმცა, 22 თებერვალს ოკუპირებულ ცხინვალის ციხეში გარდაცვლილი ტატუნაშვილის ცხედარი ისევ არ გადმოუსვენებიათ.

ადგილიდან ლტოლვილთა მინისტრმა, სოზარ სუბარმა განაცხადა, რომ ისინი მშობლებთან ერთად არიან. მინისტრის თქმით, ამ ეტაპზე მიმდინარეობს მუშაობა ტატუნაშვილის ცხედრის გადმოსვენების საკითხზე.

რამდენიმე წუთის წინ ლევან ქუტაშვილსა და იოსებ პავლიაშვილს მცხეთის პოლიციის სამმართველოში სოზარ სუბარი, შერიგების საკითხებში სახელმწიფო მინისტრი ქეთევან ციხელაშვილი, შინაგან საქმეთა მინისტრის პირველი მოადგილე კახაბერ საბანაძე და სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილე კახაბერ ქემოკლიძე შეხვდნენ. ინფორმაცია ამის შესახებ On.ge-ს შერიგებისა და სამოქალაქო თანასწორობის საკითხებში სახელმწიფო მინისტრის აპარატში მიაწოდეს.

საქართველოს სახელწიფო უსაფრთხოების სამსახურის ინფორმაციით, 2018 წლის 22 თებერვალს ოკუპირებული ცხინვალის წარმომადგენლებმა, საქართველოს მოქალაქეები: არჩილ ტატუნაშვილი, ლევან ქუტაშვილი და იოსებ პავლიაშვილი დააკავეს.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

ოსური მხარე აცხადებდა, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობდა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა, რის შემდეგაც ტატუნაშვილის ცხედრის გადმოსვენებისთვის მოლაპარაკებები დაიწყო. საქმეში ჩაერთო საერთაშორისო ორგანიზაციები და საქართველოს საპატრიარქო. თუმცა უშედეგოდ.

9 მარტს, საქართველოს პრემიერმინსიტრმა, გიორგი კვირიკაშვილმა რუსეთის ხელისუფლებას მიმართა და მოუწოდა გადაედგათ ერთობლივი ნაბიჯები ვითარების დასარეგულირებლად.