Stranger Things-ის შემქმნელები მეთ და როს დაფერები სიტყვიერ შეურაცხყოფაში სერიალის გადამღები ჯგუფის ერთ-ერთმა წევრმა, პეიტონ ბრაუნმა დაადანაშაულა.

"პერსონალურად ვარ მოწმე, როგორ აყენებდა გადასაღებ მოედანზე ორი ყველაზე გავლენიანი კაცი შეურაცხყოფას რამდენიმე ქალს. პირობა დავდე, რომ თუ ოდესმე მე მსგავს სიტუაციაში აღმოვჩნდებოდი, ამას აუცილებლად ვიტყოდი და აი, აქ ვარ. ჩემს 11,5 ათას ფოლოვერს მინდა ვუთხრა - TIME IS UP (დრო ამოიწურა)", - წერდა ინსტაგრამის პოსტში ბრაუნი.

პეიტონმა ეს პოსტი რამდენიმე საათში წაშალა, თუმცა ერთ-ერთ კომენტარზე, სადაც ეკითხებოდნენ გულისხმობდა თუ არა ის ძმებ დაფერებს, უპასუხა, რომ სწორედ მათზე ჰქონდა საუბარი და თქვა, რომ ისინი გადასაღებ მოედანზე ჯგუფის ქალ წევრებს გამუდმებით უყვიროდნენ და შეურაცხყოფას აყენებდნენ.

ბრალდებას Stranger Things-ის შემქმნელები უკვე გამოეხმაურნენ:

"ძალიან შევწუხდით იმ ფაქტით, როცა გავიგეთ, რომ სერიალის გადასაღებ მოედანზე ვინმე თავს არაკომფორტულად გრძნობდა. ვფიქრობთ, რომ მნიშვნელოვანია არ მოვახდინოთ განსხვავება და დაყოფა, რადგან ჩვენ გვჯერა, რომ ყველა მიუხედავად მისი სქესის, ორიენტაციის, რასის, რელიგიისა თუ სხვა, თავს სრულფასოვან წევრად გრძნობს იმისა, რასაც აკეთებს. ჩვენ არ ვყოფთ და არ ვანსხვავებთ ადამიანებს, გადასაღები მოედანი ერთი დიდი ოჯახია", - ამბობენ ძმები დაფერები.

Stranger Things მესამე სეზონი 2019 წელს დაბრუნდება.