თბილისის საქალაქო სასამართლომ ყოფილი მერი გიგი უგულავა და მერიის ოთხი ყოფილი მაღალჩინოსანი ფონდების საქმეში დამნაშავედ ცნო. სამი მათგანი სასამართლომ სამსახურებრივი უფლებამოსილების გადამეტებისთვის, ხოლო ერთი სამსახურებრივი მდგომარეობის გამოყენებით დიდი ოდენობით თანხების გაფლანგვაში ცნო დამნაშავედ.

მიუხედავად იმისა, რომ გიგი უგულავას ერთი წლის და სამი თვის ვადით თავისუფლების აღკვეთა მიესაჯა, ის სასჯელს არ მოიხდის. სააპელაციო სასამართლოს მიერ სხვა სისხლის სამართლის საქმეზე გამოტანილმა განაჩენმა დღეს გამოტანილი განაჩენი შთანთქა და სასჯელი მოხდილად ჩაეთვალა.

უგულავას დამატებითი სასჯელის სახით 6 თვის ვადით ჩამოერთვა სახელმწიფო სამსახურში დანიშვნითი თანამდებობის დაკავების უფლება.

მერის ყოფილ მოადგილეს, მერიის შესყიდვების საქალაქო სამსახურის ყოფილ უფროსს და ძველი თბილისის ყოფილ გამგებელს კი სასამართლომ ერთ წლისა და ორი თვის ვადით თავისუფლების აღკვეთა განუსაზღვრა, თუმცა საპროცესო გარიგების საფუძველზე მათ სასჯელი პირობითად ჩაეთვალათ და ამავე პერიოდის გამოსაცდელი ვადა დაენიშნათ. სამივე მათგანს დამატებითი სასჯელის სახით 6 თვის ვადით ჩამოერთვა სახელმწიფო სამსახურში დანიშვნითი თანამდებობის დაკავების უფლება.

ამავე საქმეზე ბრალდებულ ააიპ თბილისის განვითარების ფონდის ყოფილი თავმჯდომარეს გიორგი საბანაძეს კი 8 წლით თავისუფლების აღკვეთა მიესაჯა და დამატებითი სასჯელის სახით ერთი წლის ვადით ჩამოერთვა სახელმწიფო სამსახურში დანიშვნითი თანამდებობის დაკავების უფლება.

ბრალდების მხარე სასამართლოს გადაწყვეტილებას დასაბუთებული განაჩენის ჩაბარების შემდგომ სააპელაციო წესით გაასაჩივრებს.