ევროსაბჭოს საპარალამენტო ასამბლეის თანამომხსენებლებმა, კერსტინ ლუნდგრენმა და ტიტუს ქორლატინმა ცხვინვალში საქართველოს მოქალაქის, არჩილ ტატუნაშვილის გარდაცვალების ფაქტი დაგმეს და შეშფოთება გამოთქვეს:

"მოვუწოდებთ დე ფაქტო სამხრეთ ოსეთისა და რუსეთის ფედერაციის ხელისუფლებებს, გამჭვირვალედ გამოიძიონ არჩილ ტატუნაშვილის სიკვდილი და დასაჯონ პასუხისმგებელი პირები. ამასთან, მოვუწოდებთ მათ, გაათავისუფლონ და თბილისის კონტროლირებად ტერიტორიაზე გადაიყვანონ ტატუნაშვილთან ერთად დაკავებული საქართველოს ორი მოქალაქე."

თანამომხსენბლებმა, ასევე, კიდევ ერთხელ დაადასტურეს, რომ მხარს უჭერენ საქართველოს ტერიტორიულ მთლიანობას და საერთაშორისოდ აღიარებულ საზღვრებს.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე გაათავისუფლეს.