პანორამა თბილისის გოლფის კლუბის მშენებლობაზე მუშა გარდაიცვალა. ამის შესახებ ინფორმაციას ifact ავრცელებს. მათივე ცნობით, შემთხვევა 21 იანვარს მოხდა, გარდაცვლილი მუშა ლევან ლაფაჩია.

პანორამა თბილისს ყოფილი პრემიერის ბიძინა ივანიშვილის თანაინვესტირების ფონდი აშენებს.

გამოცემის ცნობით, 21 იანვრის საღამოს, 4-დან 5 საათამდე ლევანი თავის მოვალეობას ასრულებდა, როცა ზედა სართულზე ახლადდასხმული ბეტონის ჭერი ჩამოინგრა და ქვეშ მოიყოლა.

"შემთხვევის თვითმხილველი ამბობს, რომ ბეტონის ჭერი საკმარისად გამაგრებული არ იყო და ჩამოშლაც ამან გამოიწვია. ლაფაჩს რეზინის მილი ხელში ეჭირა და ბეტონს ასხამდა. მის გარდა ამ დროს იქ, სადაც ჭერი ჩამოწვა, არავინ იყო. ვინაიდან მუშები ხელფასს გამომუშავების მაჩვენებლის მიხედვით იღებდნენ, ცდილობდნენ, რაც შეიძლება მეტი საქმე ნაკლებ დროში მოესწროთ. ამიტომ ბეტონის ბოძები, რომლებსაც ჭერი უნდა დაეჭირათ ჯერ კიდევ სველი იყო, როცა ზემოდან ბეტონის საფარი დაასხეს. ბოძებმა სიმძიმეს ვერ გაუძლო და ჩამოწვა",- წერს ifact.

On.ge დაუკავშირდა შინაგან საქმეთა სამინისტროს და მათგან პასუხს მიღებისთანავე შემოგთავაზებთ.

21 იანვრის შემდეგ, საქართველოში კიდევ ორი მუშა დაიღუპა, ერთი კახეთში, ერთი კი თბილისში. მათი გარდაცვალების შესახებ ინფორმაცია, მედიამ იმ დღესვე გაავრცელა.

დღეს, 23 ნოემბერს, თბილისში გაერთიანებული პროფკავშრები აქციას მართავენ, სლოგანით: "მუშა რომელიც ჯერ არ მომკვდარა მე ვარ". ისინი ვარდების მოედნიდან პარლამენტის შენობისკენ მიემართებიან.

აქციის მონაწილეები მოითხოვენ, საქართველოს ხელისუფლებამ გაატაროს რეალური შრომითი პოლიტიკა, შექმნას უსაფრთხო სამუშაო გარემო და დაიცვას დასაქმებულების უფლებები.