აშშ-ის პრეზიდენტმა დონალდ ტრამპმა მასწავლებლებისთვის სკოლაში იარაღის ტარების იდეას მხარი დაუჭირა. მისივე თქმით, უნდა გაუქმდეს წესი, რომლითაც სკოლის სიახლოვეს იარაღის ტარება იკრძალება.

ტრამპმა ამის შესახებ ფლორიდის სკოლაში თავდასხმისას დაღუპულთათვის მიძღვნილ კონფერენციაზე განაცხადა. კონფერენციაზე მასწავლებლები და მშობლები მოითხოვდნენ, რომ მთავრობამ გააკეთოს ყველაფერი, რათა სამომავლოდ მსგავსი ტრაგედია თავიდან აიცილონ.

კონფერენციაზე ტრამპმა თქვა, რომ თუ სკოლაში ისეთი მასწავლებელი იქნებოდა, რომელსაც იარაღის გამოყენება ეცოდინებოდა, თავდამსხმელს ის საკმაოდ მალე შეაჩერებდა.

"ძალიან მკაცრ შემოწმებებს ჩავატარებთ, განსაკუთრებით ფსიქიკური ჯანმრთელობის კუთხით", - განაცხადა დონალდ ტრამპმა.

ფლორიდის საშუალო სკოლაში შეიარაღებული თავდასხმისას 17 ადამიანი გარდაიცვალა. თავდაპირველად თავდამსხმელმა სახანძრო სისტემა აამუშავა, რამაც სკოლაში პანიკა გამოიწვია, და ამის შემდეგ ხალხის მიმართულებით ცეცხლი გახსნა. თავდამსხმელი სკოლის ყოფილი მოსწავლე, 19 წლის ნიკოლას კრუზი, ინციდენტიდან ერთ საათში დააკავეს.