"ჩვენ იმდენად სწრაფად მივდიოდით, იმდენად სწრაფად ვვითარდებით, იმდენად სწრაფად კეთდებოდა პროექტებიც, რომ ვერ ვუხსნიდით მოსახლეობას თუ რა კეთილდღეობა შეიძლებოდა მათ მოეტანათ," - ასე უპასუხა არჩევანის წამყვანის, გიორგი გაბუნიას შეკითხვას, თუ როგორ აპირებს ენმ მოსახლეობის სხვადასხვა პროექტებში ჩართვას, აჭარის მთავრობის ყოფილმა თავჯდომარემ, ლევან ვარშალომიძემ.

მან ასევე განმარტა, რომ 2012 წელს სწორედ მოსახლეობის ნაკლები ჩართულობა გახდა ენმ-ს დამარცხების მიზეზი. ვარშალომიძემ ასევე განაცხადა, რომ ბოლო წლების განმავლობაში ერთიანმა ნაციონალურმა მოძრაობამ თავისი შეცდომების გაანალიზება მოახერხა:

"დამიჯერეთ, ეს სამწელიწადნახევარი დიდი დრო იყო იმისთვის, რომ უფრო მეტი ახალი პროექტი და ინოვაცია შემოვიტანოთ ჩვენს რეგიონში".

3 ივლისს ლევან ვარშალომიძე საქართველოში დაბრუნდა. ვარშალომიძე აჭარის ავტონომიური რესპუბლის უმაღლესი საბჭოს არჩევნებში, რომელიც 8 ოქტომბერს გაიმართება, ნაციონალური მოძრაობის სიის პირველი ნომერი იქნება.