საპარლამენტო უმრავლესობის წევრი, ლევან გოგიჩაიშვილი ამბობს, რომ ტელეკომპანია იბერიას მიმართ ხელისუფლების მხრიდან ზეწოლა არ არსებობს. ასე გამოეხმაურა ქართული ოცნების წევრი არხის საინფორმაციო სამსახურის ხელმძღვანელის, ვახო ხუზმიაშვილის განცხადებას, რომელმაც მფლობელის ფინანსური პრობლემები იბერიას სარედაქციო პოლიტიკას დაუკავშირა.

"განცდა დამრჩა, რომ ამ კომპანიას კონკურენტ კომპანისთან პრობლემები აქვს და ამას აბრალებს სახელმწიფოს. ცოტა შანტაჟის სუნი ასდის და ამ ქვეყანაში შანტაჟი ისჯება", - განუცხადა ლევან გოგიჩაიშვილმა რუსთავი 2-ს.

ბოლო ერთ კვირაში კიდევ ერთი ტელეკომპანიის - TV პირველის წამყვანებმა განაცხადეს, რომ კონკრეტული ზეწოლა ხელისუფლების წარმომადგენლების მხრიდან არ ყოფილა, თუმცა იყო სიგნალები, ტელეკომპანიის შინაარსის სამომავლოდ შეცვლაზე.