საქართველოს პარლამენტის თავმჯდომარე, ირაკლი კობახიძე ამბობს, რომ საპარლამენტო უმრავლესობა მაუწყებლობის შესახებ კანონზე დადებულ ვეტოს დაძლევს. კანონპროექტი საზოგადოებრივ მაუწყებელს დამატებით სარეკლამო დროს გაყიდვისა და რიგი მომსახურების ტენდერის გარეშე შესყიდვის უფლებას აძლევს.

მისი თქმით, უმრავლესობამ კანონპროექტთან დაკავშირებით სიღრმისეულად იმსჯელა და ვეტოს დაძლევის გადაწყვეტილება მიიღო.

"გამონაკლისი იქნება რამდენიმე დეპუტატი. ესენი არიან ის დეპუტატები, რომლებიც ამ თვეების განმავლობაში საკუთარი არგუმენტებით გამოდიოდნენ კანონპროექტის წინააღმდეგ", - აღნიშნა კობახიძემ.

მისი თქმით, კანონპროექტის კანონად ქცევის შემთხვევაში, საზოგადოებრივი მაუწყებლის ბიუჯეტი დაახლოებით ორი მილიონით გაიზრდება, რაც მთლიანი ბაზრის ერთ პროცენტამდეა.

"ბუნებრივია რყევებს ვერ გამოიწვევს და ვერც რაიმე არსებით ცვლილებებს მედია ბაზარზე. შესყიდვებს რაც შეეძლება, აქ ვართ შეჯერებული ყველასთან", - განაცხადა კობახიძემ.

რამდენიმე დღის წინ, როცა პარლამენტში ირაკლი კობახიძე მედიისა და არასამათვარობო ორგანიზაციების წარმოამდგენლებს ხვდებოდა განაცხადა, რომ შესყიდვების ნაწილში, კერძო მაუწყებლები საზოგადოებრივ მაუწყებელთან შედარებით უპირატეს მდგომარეობაში არიან.