არჩევნების მეორე ტურის ჩატარების შედეგად, ეუთოს საპარლამენტო ასამბლეის პრეზიდენტად, ავსტრიელი კრისტინა მუტონენი აირჩიეს, გიგი წერეთელი კი დამარცხდა. ეუთოს საპარლამენტო ასამბლეის 25-ე სესია საქართველოში ამით დასრულებულია.

გამარჯვების შემდეგ, მუტონენმა განაცხადა, რომ წინ დიდი სამუშაო ელის, დემოკრატია კი არის პროცესი, რომელსაც მუდმივად პროგრესი სჭირდება:

"ჩვენ ამ კუთხით აქტიურად ვიმუშავებთ. დემოკრატიის კარგი მაგალითი იყო არჩევნები, რომელიც აქ ჩატარდა. მინდა მადლობა გადავუხადო ყველას მასპინძლობისთვის. გული გვწყდება, რადგან დღეს თბილისის დატოვება გვიწევს".

ერთიანი ნაციონალური მოძღაობის წევრმა, არჩევნებში დამარცხებულმა გიგი წერეთელმა კი განაცხადა, რომ ის მიმართვები, რომელიც საქართველოს ხელისუფლების მხრიდან მის საწინააღმდეგოდ იყო გაკეთებული, ღიაა ყველასთვის:

"არ მინდა დღეს ამაზე საუბარი, არავის გავუსწორებ ანგარიშს. უბრალოდ გარკვეულ შეფასებებს ვუპასუხებ ნელნელა.კიდევ ერთხელ გეუბნებით, რაც ვისწავლეთ, რაც ვნახეთ ჩემს საქმიანობაში გამოვიყენებ და არა ხოლოდ ჩემს საქმიანობაში. ეს საკითხი, როგორც ერთ-ერთი ქრესტომათიული მაგალითი შევა ალბათ ეუთოს ისტორიაში ან ასამბლეის, როგორ არ უნდა იქცეოდეს ხელისუფლება ქვეყანაში".