საქართველოს პარლამენტის თავმჯდომარეს, ირაკლი კობახიძეს მიაჩნია, რომ შესყიდვების ნაწილში, კერძო მაუწყებლები საზოგადოებრივ მაუწყებელთან შედარებით უპირატეს მდგომარეობაში არიან. ამის შესახებ მან მაუწყებლებთან და არასამთავრობო ორგანიზაციებთან საზოგადოებრივი მაუწყებლის შესახებ კანონში შესატან ცვლილებებზე შეხვედრის დროს თქვა.

"კერძო მაუწყებლებს შეუძლიათ შეისყიდონ ნებისმიერი პროდუქტი, ნებისმიერი პროცედურით, მარტივი პროცედურით, რაც მას ანიჭებს ფარდობით უპირატესობას. შესავამისად, საზოგადოებრვი მაუწყებელი მოკლებულია იმ შესაძლებლობას, რომ ასეთივე ხარისხიანი პროდუქტი შეისყიდოს", - თქვა კობახიძემ.

მისი თქმით, როდესაც პროცედურები მარტივდება თავისუფალი სივრცე მეტია და რისკი იზრდება. როგორც მან აღნიშნა, მაუწყებლის ხარჯების კონტროლის სამი მექანიზმი არსებობს: სამეურვეო საბჭოს, აუდიტის სამსახური და საზოგადოება, რომელიც საბჭოსგან მიიღებს ინფორმაციას.

"მთავარი ისაა, შექმნის თუ არა ეს [კანონი] პრობლემას, სირთულეს მედიაბაზარზე. ამ კუთხით, ეს საკითხი აქტუალობით არ სარგებლობს. კორუფცია თუ იქნება საზოგადოებრივ მაუწყებელში, ეს, პირიქით, შეიძლება, უკეთესიც იყოს კერძო მაუწყებლებისთვის იმისთვის, რომ რაც გვაქვს [სარეკლამო თანხების] კლების ტენდენცია კიდევ უფრო გაგრძელდება. ამ კუთხით ეს საკითხი აქტუალური არაა, რაც მეტი იქნება კორუფცია, უფრო დაბალი იქნება რეიტინგი, თავისთავად", - თქვა კობახიძემ.

არასამთავრობო ორგანიზაციების ნაწილს მიაჩნიათ, რომ საზოგადოებრივი მაუწყებლის შესყიდვების ტენდერის ვალდებულებისგან გათავისუფლება კორუფციის საფრთხეს გაზრდის.