საფრანგეთის პარლამენტის საგამოძიებო კომისიის რეკომენდაციაა, რომ აუცილებლად უნდა ჩატარდეს საფრანგეთის დაზვერვის სამსახურის რეფორმა. საგამოძიებო კომისიამ აღნიშნული რეკომენდაცია 2015 წლის ნოემბერში პარიზში მომხდარი ტერაქტების შესწავლის შემდეგ გასცა. ტერაქტებს მაშინ 130-მდე ადამიანი ემსხვერპლა, ათეულობით კი დაშავდა.

როგორც საგამოძიებო კომისიამ დაადგინა, საფრანგეთის დაზვერვის სამსახურების პასუხი ტერორისტულ საფრთხესა და ტერორისტულ აქტებზე არ იყო ეფექტიანი, რის გამოც, აუცილებელია აღნიშნული სისტემის რეფორმირება. რეკომენდაციის მიხედვით, უნდა ჩამოყალიბდეს ერთიანი, ცენტრალიზებული სისტემა, სადაც გაერთიანდება დაზვერვასა და უსაფრთხოებაზე პასუხისმგებელი ყველა უწყება. ახალი, ცენტრალიზებული უწყება დაახლოებით ამერიკის შეერთებული შტატების ეროვნული კონტრტერორისტული ცენტრის მსგავსი უნდა უნდა იყოს.

ფრანგი პარლამენტარები მიიჩნევენ, რომ აღნიშნული ნაბიჯის გადადგმა აუცილებელია ქვეყნის უსაფრთხოების უზრუნველსაყოფად.