მიხეილ სააკაშვილის პარტია ახალი ძალების მოძრაობა მხარდამჭერებს მოუწოდებს ჟულიანის და ბორისპოლის აეროპორტებთან ბლოკპოსტები შექმნან, გადაკეტონ კიევიდან გასასვლელი გზები და შეამოწმონ ყველა საეჭვო ავტოტრანსპორტი იმისთვის, რომ მიხეილ სააკაშვილის ქვეყნიდან დეპორტაცია არ დაუშვან. ამის შესახებ მათ გავრცელებულ განცხადებაშია ნათქვამი.

მოძრაობის წევრებს მიაჩნიათ, რომ სააკაშვილის დაკავება ოპონენტის მოშორების მცდელობაა და მის დეპორტაციის კანონიერი საფუძველი არ არსებობს.

"ეს უკრაინის მოქალაქის გატაცების მცდელობაა ბანდიტების მიერ"

მათი თქმით, სააკაშვილი უცნობმა პირებმა გაიტაცეს და უცნობი მიმართულებით წაიყვანეს. ისინი ვარაუდობენ, რომ სააკაშვილს ბორისპოლის ან ჟულიანის აეროპორტში მიიყვანენ, თუმცა მიაჩნიათ რომ არის შანსი საქართველოს ექსპრეზიდენტი და ოდესის ყოფილი გუბერნატორი კიევიდან ავტოტრანსპორტით გაიყვანონ.

სააკაშვილი რამდენიმე საათის წინ რესტორანში დააკავეს. ამის შესახებ ინფორმაცია მისმა პრესსამსახურმა გაავრცელა. უკრაინული მედია სამართალდამცავი ორგანოდან წყაროზე დაყრდნობით წერს, რომ მიხეილ სააკაშვილი საიმიგრაციო სამსახურის მოთხოვნით დააკავეს. გავრცელებული ინფორმაციით, პირებს, რომლებმაც სააკაშვილი დააკავეს ფორმაზე ეწერათ საზღვრის დაცვის სამსახური.

პირველად სააკაშვილი 5 დეკემბერს დააკავეს, მაშინ როდესაც გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა. დაკავებიდან რამდენიმე წუთის შემდეგ მიხეილ სააკაშვილი მისმა მხარდამჭერებმა ბლოკირებული მიკროავტობუსიდან გაათავისუფლეს.

9 დეკემბერს მეორედ დაკავების შემდეგ მიხეილ სააკაშვილმა უვადო შიმშილობა გამოაცხადა. დაკავებიდან მეორე დღეს, კიევში პეტრო პოროშენკოს იმპიჩმენტისა და სააკაშვილის მხარდასაჭერი მარში გაიმართა. კიევის სასამართლომ მიხეილ სააკაშვილი სასამართლო დარბაზიდან გაათავისუფლა. ამით სასამართლომ პროკურატურის შუამდგომლობა არ დააკმაყოფილა - პროკურორებმა ოდესის ყოფილი გუბერნატორისთვის ელექტრონული სამაჯურით შინაპატიმრობის შუამდგომლობა დააყენეს.

პროკურატურამ გადაწყვეტილება გაასაჩივრა. სააპელაციო სასამართლომ მიხეილ სააკაშვილს შინაპატიმრობა მიუსაჯა. მოსამართლის განცხადებით, საღამოს 22 საათიდან დილის 7 საათამდე საქართველოს მესამე პრეზიდენტს გადაადგილება ეკრძალება.