საქართველოს მთავრობის დადგენილებით, სუნელების და სანელებლების წარმოება-გადამუშავებასა და ბაზარზე განთავსებასთან დაკავშირებით, რისკის მართვის დროებითი ზომები ამოქმედდება.

რისკის მართვის დროებითი ზომების მოქმედების ვადა განსაზღვრულია არაუმეტეს ორი წლით. ახალი წესების თანახმად:

  • იკრძალება ფიზიკური პირების (გარდა ინდივიდუალური მეწარმეებისა) მიერ სუნელებისა და სანელებლების წარმოება ან/და გადამუშავება და რეალიზაცია;
  • ფიზიკური პირების მიერ სუნელებისა და სანელებლების რეალიზაცია შესაძლებელია მხოლოდ იმ შემთხვევაში, როცა მომხმარებლის თანდასწრებით ადგილზე ხდება სუნელებისა და სანელებლების დაფქვა;
  • ბიზნესოპერატორის მიერ წარმოებული ან/და გადამუშავებული სუნელებისა და სანელებლების ბაზარზე განთავსება შესაძლებელია მხოლოდ დაფასოებული სახით საქართველოს კანონმდებლობით განსაზღვრული ეტიკეტირების მოთხოვნების დაცვით, რაც უზრუნველყოფს მიკვლევადობას და ეფექტიანი სახელმწიფო კონტროლის განხორციელებას.

სურსათის ეროვნული სააგენტოს განცხადებით, 2017 წელს სახელმწიფო კონტროლის ფარგლებში ჩატარებული ლაბორატორიული კვლევის შედეგებით, სუნელებისა და სანელებლების 187 ნიმუშიდან 33 შემთხვევაში (18%-ია) გამოვლინდა ტყვიის გადაჭარბებული შემცველობა.

დარღვევები, უმეტეს შემთხვევაში, (88%) იმ ფიზიკური პირების, ასევე კუსტარული წარმოებების პროდუქციაში დაფიქსირდა, რომლებიც არ იყვნენ რეგისტრირებულნი და, შესაბამისად, მათ მიმართ არ ხორციელდებოდა სახელმწიფო კონტროლი.

სააგენტოს განცხადებით, სახელმწიფო კონტროლის დროს, ადგილი ჰქონდა სავარაუდო ფალსიფიკაციის შემთხვევებსაც, მათ შორის, არასასურსათო დანიშნულების ნედლეულის გამოყენების ფაქტებს.

2017 წლის 30 ივნისს On.ge-მ გაავრცელა ინფორმაცია, რომ ნიუ-იორკის ჯანდაცვის დეპარტამენტი ქართული სუნელების მომხმარებლებს აფრთხილებს აღნიშნულ პროდუქციაში ტყვიის საშიში დოზის შემცველობის შესახებ. თავდაპირველად სურსათის ეროვნულმა სააგენტომ აღნიშნული ინფორმაცია უარყო. ნიუ-იორკის ჯანდაცვის დეპარტამენტმა On.ge-ს მალევე მიაწოდა დამატებითი ინფორმაცია ქართული წარმოშობის სანელებლებში ტყვიის შემცველობის შესახებ.