უშგულში, უშხვანარში, მაზერში, ეცერსა და დაბა ლენტეხში, მთის კურორტების განვითარების კომპანიის ზედამხედველობით, 200-300 მეტრის სიგრძის მინი საბაგიროები უკვე დამონტაჟდა და პროექტი სხვა რეგიონებშიც გაგრძელდება. ამის შესახებ დღეს, 7 თებერვალს გამართულ მთავრობის სხდომაზე პრემიერ-მინისტრმა, გიორგი კვირიკაშვილმა განაცხადა.

კვირიკაშვილის თქმით, თითო ასეთი საბაგიროს ფასი დაახლოებით 25 ათასი ევროა. მისივე განცხადებით, დაგეგმილია სასეირნო და მთასმსვლელებისათვის განკუთვნილი ბილიკების მოწყობა. ამ ბილიკების გასწვრივ კი ტურისტული ინფრასტრუქტურა მოეწყობა:

"მთები არის ჩვენი სიმდიდრე და მთები არის ის, რაც საქართველოს საშუალებას მისცემს, რომ ეკონომიკური მდგომარეობა მოკლე პერიოდში მნიშვნელოვნად შეცვალოს უკეთესობისკენ."