მიუხედავად იმისა, რომ Falcon Heavy-ს გარე ბირთვები (იგივე გამწევები) წარმატებით დაჯდა გაშვების შემდეგ, ამ რაკეტის ცენტრალური გამწევი დასაჯდომ ადგილს ასცდა, რომელიც ოკეანეში იყო მოთავსებული.

თავიდან, როდესაც ეს უზარმაზარი რაკეტა ჰაერში აიწია და აკრიფა დიდი სიჩქარე, გვერდითა გამწევები წარმატებით მოსწყდა და ასევე წარმატებით, უსაფრთხოდ დაეშვა მიწაზე. ორ მილიონზე მეტი ადამიანი პირდაპირ ეთერში უყურებდა ამ საოცარ სანახაობას. თუმცა, მესამე გამწევი, რომელიც ცოტა ხნის მერე მოწყდა, ოკეანეში უნდა დამჯდარიყო სპეციალურ პადზე.

ფოტო: SpaceX

გამოყოფიდან რამდენიმე წუთის შემდეგ, კავშირი გაწყდა გამწევთან და, აქედან გამომდინარე, კამერებიც გაითიშა. არავინ იცოდა, რა ბედი ეწია მას. მასკმა, რომელსაც ახლახანს ჰქონდა პრეს-კონფერენცია, განაცხადა, რომ ცენტრალური გამწევი ოკეანეს 500 კმ/სთ-მდე სიჩქარით დაასკდა.

ამის მიუხედავად, Falcon Heavy-ს ტესტირებამ წარმატებით ჩაიარა: მან ორბიტაზე გაიყვანა ტესლას მანქანა, რომელშიც მანეკენი, სახელად Starman იჯდა და ჩართული იყო დევიდ ბოუის Space Oddity.