შინაგან საქმეთა სამინისტროს ინფორმაციით, სამართალდამცველებმა კლინიკური კარდიოლოგიის ინსტიტუტის ტექნიკური მენეჯერი დიდი ოდენობით ფსიქოტროპული ნივთიერების უკანონო შეძენა-შენახვა-გასაღების ფაქტზე, მისსავე სამუშაო ადგილზე, სასამართლოს განჩინების საფუძველზე დააკავეს.

შსს განცხადებით, გამოძიებამ დაადგინა, რომ ბრალდებული ფსიქოტროპულ საშუალებას სისტემატურად ყიდდა. მათივე ინფორმაციით, პოლიციამ, ნივთმტკიცებად ამოიღო დაკავებულის მიერ გაყიდული ფსიქოტროპული ნივთიერება პრეგაბალინის შემცველი პრეპარატ ლირიკა-ს 60 აბი, მისი სამუშაო ოთახის ჩხრეკისას კი ფსიქოტროპული ნივთიერება პრეგაბალინის შემცველი 15 კაფსულა.

გამოძიება საქართველოს სისხლის სამართლის კოდექსის 261-ე მუხლის მე-3 ნაწილის „ა“ ქვეპუნქტით მიმდინარეობს, რაც დიდი ოდენობით ფსიქოტროპული ნივთიერების შეძენა-შენახვა-გასაღებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე.