მოვლენები თუ გეგმის მიხედვით განვითარდა, SpaceX-ის გიგანტურ რაკეტა Falcon Heavy-ს დღეს, 6 თებერვალს, ნასას კენედის კოსმოსური ცენტრიდან გაუშვებენ. ილონ მასკის კომპანია სამსაათიან პირდაპირ ეთერს თბილისის დროით 22:30-ზე დაიწყებს, რომელსაც შეგიძლიათ უყუროთ აქ.

Falcon Heavy ილონ მასკის SpaceX-ის მიერ დამზადებული სუპერ-მძიმე კოსმოსური ხომალდია, რომელსაც დედამიწის ქვედა ორბიტაზე 70 ტონა ტვირთის გატანა შეუძლია. ეს გიგანტური რაკეტა მოდიფიცირებული Falcon 9 მოდელია, ოღონდ ამ უკანასკნელის ორი გამწევით.

მასკმა კონფერენციაზე იკითხა: "ერთი შეხედვით, ძალიან ადვილი ჩანს: შეაერთე Falcon 9-ის ორი მთავარი გამწევი. ადვილია, არა?"

თავისივე დასმულ შეკითხვას კი ასეთი პასუხი გასცა:

"საკმაოდ რთულია. ამ დროს ყველაფერი იცვლება. ყველა ტვირთი იცვლება, აეროდინამიკა მთლიანად იცვლება, ვიბრაცია და აკუსტიკა სამმაგი ხდება".

ამიტომ, Falcon Heavy-ს დიდი დრო დასჭირდა გასამართად. სუპერ-მძლავრი რაკეტა უკვე მზადაა გასაშვებად. ხომალდი მზის გარშემო ძალიან ელიფსურ ორბიტაზე წითელ Tesla Roadster-ს გაიყვანს.

ეს ორბიტა დროთა განმავლობაში მანქანას მარსთან ახლოს მიიყვანს. ამით ილონ მასკი თავის უმთავრეს გეგმას, დაასახლოს წითელი პლანეტა ადამიანებით, მწვანე შუქს უნთებს.

SpaceX-მა უკვე დაიწყო მუშაობა Heavy-ს შთამომავალზე - Big Fucking Rocket-ზე, რომელიც მარსზე ადამიანების გადაყვანას შეძლებს.

არ არსებობს 100%-იანი გარანტია იმისა, რომ ყველაფერი გეგმის მიხედვით შესრულდება. ახლად დამზადებული რაკეტები, რომლებიც ტესტირებას პირველად გადიან, ყოველთვის ვერ აღწევენ დანიშნულების ადგილს. რა თქმა უნდა, მასკიც შეგუებულია ამ აზრს და წინასწარ დიდ იმედებს არ ამყარებს.

ეს კი მისი პირველი სტატიკური ტესტი იყო:

დაველოდოთ, რა მოხდება და წარმატება ვუსურვოთ კოსმოსური ფრენების რევოლუციონერს.

განახლება: გაშვება რამდენიმე საათით გადაიდო. SpaceX-ის ინფორმაციით, რაკეტა 00:05-ზე აფრინდება თბილისის დროით.