რა გაწუხებთ ყველაზე მეტად თვითმფრინავით გადაადგილებისას? ტურბულენტობა? პატარა ადგილი ფეხის გასაშლელად? თუ ინტერნეტის არარსებობა? ხანგრძლივი ფრენის დროს თვითმფრინავში თავშესაქცევი, როგორც წესი, არაფერია. თუ წინასწარ არ გაქვთ პლანშეტებსა და ნოუთბუქებში ჩაწერილი ფილმები, ძილის გარდა დიდი არჩევანი არ გრჩებათ.

ბრიტანულმა კომპანიამ გადაწყვიტა ეს პრობლემა მოეგვარებინა და თვითმფრინავები Wi-Fi ტექნოლოგიით აღეჭურვა. პირველ ეტაპზე, British Airways ამ მომსახურებით მხოლოდ სამ ბოინგს უზრუნველყოფს, თუმცა როგორც კომპანია აცხადებს, მომდევნო ორი წლის განმავლობაში 118 თვითმფრინავს ექნება Wi-Fi-ზე წვდომა. ასევე აღსანიშნავია, რომ ეს სიახლე მხოლოდ გრძელ მანძილზე განხორციელებულ რეისებს ეხება, თუმცა უახლოეს მომავალში მოკლე მანძილზეც დაემატება.

კომპანია თავის კლიენტებს ორი ტიპის მომსახურებას შესთავაზებს: Browse-სა და Stream-ს. Browse ძირითადად სოციალური მედიის, მესენჯერისა და უბრალო საიტების გამოყენებით შემოიფარგლება და მისი ფასი 5 ფუნტ-სტერლინგი იქნება. რაც შეეხება Stream-ს, ის ძირითადად Netflix-ისა და სხვა ვიდეო საიტებისთვის გამოიყენება და მისი ფასი 8 ფუნტ-სტერლინგია.

ინტერნეტის შეძენა მგზავრებს აფრენიდან 10 წუთის შემდეგ შეეძლებათ. პირველი საათი უფასოა, დარჩენილი საათებისთვის კი კლიენტებს ფულის გადახდა მოუწევთ.